డిసెంబర్ తర్వాత ఏం చేద్దాం?: కీలక నేతలతో కెసిఆర్ మంతనాలు

హైదరాబాద్‌: డిసెంబర్ 31వ తేదీ తర్వాత ఏం చేద్దామనే విషయంపై తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు శుక్రవారం వ్యూహకర్తలతో రహస్య భేటీ జరిపారు. మాజీ పార్లమెంటు సభ్యుడు వైయస్ జగన్ నివాసానికి సమీపంలో ఉన్న ఓ గెస్ట్ హౌస్ లో ఆయన మంతనాలు జరిపారు. ఈ సమావేశంలో తెలంగాణ రాజకీయ జెఎసి చైర్మన్ కోదండరామ్, గజ్జల కాంతం, విజయశాంతి పాల్గొన్నారు. తెలంగాణకు చెందిన వివిధ జెఎసిల నాయకులు ఈ సమావేశంలో పాల్గొన్నారు. శ్రీకృష్ణ కమిటీ నివేదిక వచ్చిన తర్వాత తెలంగాణ సాధన కోసం ఉద్యమాన్ని ఉధృతం చేస్తామని కెసిఆర్ పదే పదే చెబుతున్న విషయం తెలిసిందే.

డిసెంబర్ 31వ తేదీ తర్వాత సహాయ నిరాకరణ ఉద్యమాన్ని చేపట్టాలని, తెలంగాణవ్యాప్తంగా ఉద్యమాన్ని ఉధృతం చేయాలని, ఇందుకు ప్రజలు సమాయత్తం చేయాలని సమావేశంలో నిర్ణయించినట్లు సమాచారం. అవసరమైతే వచ్చే ఏడాది జనవరి 15వ తేదీ తర్వాత తాను ఆమరణ నిరాహార దీక్ష చేస్తానని కెసిఆర్ చెప్పిన విషయం తెలిసిందే.