క్రిస్ట్ర్మస్ సందర్భంగా ముంబైకి ఉగ్రవాద ముప్పు: పోలీసుల హెచ్చరిక

ముంబై‌: క్రిస్ట్ర్మస్ పర్వదినం సందర్బంగా ముంబైకి ఉగ్రవాదుల నుంచి ముప్పు పొంచి ఉందని ముంబై పోలీసులు అనుమానాలు వ్యక్తం చేశారు. అప్రమత్తంగా ఉండాలని వారు ప్రజలను హెచ్చరించారు. దాడులు చేసేందుకు లష్కరే తోయిబా ఉగ్రవాదులు నగరంలోకి ప్రవేశించినట్లు అనుమానాలు వ్యక్తం చేస్తున్నారు. లష్కరే తోయిబా ఉగ్రవాదిగా అనుమానిస్తున్న ఓ వ్యక్తి చిత్రాన్ని కూడా ముంబై పోలీసులు శుక్రవారం విడుదల చేశారు. దాడులు చేయడానికి లష్కరే తోయిబా ఆ వ్యక్తిని నియోగించినట్లుగా పోలీసులు భావిస్తున్నారు.

లష్కరో తోయిబా 20, 30 ఏళ్ల మధ్య వయస్సు గల నలుగురిని నియోగించినట్లు, ఈ నలుగురు నగరంలో విధ్వంసాలకు దిగవచ్చునని జాయింట్ పోలీసు కమిషనర్ అన్నారు. చిత్రాన్ని పోలిన వ్యక్తి కనిపిస్తే తమకు తెలియజేయాలని పోలీసులు ప్రజలను కోరారు. దానికోసం రెండు టెలిఫోన్లను కేటాయించినట్లు వారు తెలిపారు. ఆ ఫోన్ నెంబర్లు - 022 - 22633333, 022 - 22625020.