విశాఖపట్నం జిల్లాలో వైయస్ జగన్ అనుచరుడి హత్య

విశాఖపట్నం‌: మాజీ పార్లమెంటు సభ్యుడు వైయస్ జగన్ అనుచరుడు విశాఖపట్నం జిల్లాలో దారుణ హత్యకు గురయ్యాడు. విశాఖపట్నం జిల్లా ఊరట్ల మండలం వెంకటాపురంలో గోవిందు అనే వ్యక్తిని గుర్తు తెలియని వ్యక్తులు కాల్చి చంపారు. దివంగత నేత వైయస్ రాజశేఖర రెడ్డి విగ్రహ స్థాపన పనులను చూస్తుండగా గోవిందుపై దుండగులు కాల్పులు జరిపారు. ఈ కాల్పుల్లో అతను మరణించాడు. ఈ సంఘటన శుక్రవారం రాత్రి జరిగింది. పాత కక్షల కారణంగానే ఈ హత్య జరిగిందని భావిస్తున్నారు.

వైయస్ విగ్రహ ప్రతిష్టాపన పనుల పర్యవేక్షణకు మాజీ మంత్రి కొణతాల రామకృష్ణ, పాయకరావుపేట శాసనసభ్యుడు బాబూరావు సంఘటనకు ముందు అక్కడికి వచ్చి వెళ్లారు. వాహనంలో వచ్చిన ముగ్గురు దుండగులు వచ్చి దాదాపు పది రౌండ్లు కాల్పులు జరిపినట్లు సమాచారం. గోవిందుకు చెందిన కారుపై కూడా వారు కాల్పులు జరిపారు.