వైఎస్ జగన్ లక్ష్యదీక్షలో పాల్గొన్న వారిపై చర్యలు ఉంటాయి!: ఆమోస్

హైదరాబాద్: సంక్షేమ పథకాలపై వక్ర భాష్యం చెబుతూ ప్రజలకు తప్పుడు సంకేతాలు ఇవ్వడం మాజీ పార్లమెంటు సభ్యుడు వైఎస్ జగన్మోహన్ రెడ్డికి సరి కాదని కాంగ్రెస్ సీనియర్ నాయకుడు ఆమోస్ ఆదివారం విలేకరులతో అన్నారు. దివంగత ముఖ్యమంత్రి వైఎస్ రాజశేఖరరెడ్డి కుటుంబాన్ని కాంగ్రెస్ గానీ, ఏఐసిసి అధ్యక్షురాలు సోనియాగాంధీ గానీ ఏనాడూ నిర్లక్ష్యం చేయటం కానీ, అగౌరవ పర్చటం గానీ చేయలేదన్నారు.

పార్టీ గీతను దాటిన శాసనసభ్యులపై చర్యలుంటాయన్నారు. జగన్ లక్ష్యదీక్షలో పాల్గొన్న ఎమ్మెల్యేలపై అధిష్టానం చర్యలు తీసుకుంటుందన్నారు. వైఎస్ రాజశేఖరరెడ్డిపై అభిమానం ఉంది కాబట్టే అందరూ నల్లకాలువ వద్దకు వెళ్లి చూశారన్నారు. వైఎస్ కుటుంబానికి సోనియా ప్రాధాన్యత ఇచ్చింది కాబట్టే స్వయంగా ఆమె వచ్చి పరామర్శించారని చెప్పారు. కాంగ్రెస్ వ్యతిరేక కార్యక్రమాలకు ఎవరు పాల్పడినా చర్యలు ఉంటాయన్నారు.