గతి తప్పి జిఎస్ఎల్వీ-ఎఫ్6 విఫలం: నింగికెగిసిన 63 సెకండ్లలో కూల్చివేత

నెల్లూరు: శ్రీ పొట్టి శ్రీరాములు నెల్లూరు జిల్లా శ్రీహరికోటలోని షార్ నుంచి నింగికెగసిన జీఎస్ఎల్‌వీ-ఎఫ్06 రాకెట్ విఫలమైంది. సాంకేతిక లోపాలతో గమనం అదుపు తప్పడాన్ని గమనించిన శాస్త్రవేత్తలు సాయంత్రం నాలుగు గంటల సమయంలో దాన్ని ఆకాశంలోనే పేల్చేశారు. రాకెట్ మొదట సాఫీగా ప్రయాణించినప్పటికీ 48 నుంచి 53వ సెకండ్ వరకు రాకెట్ గమనం అదుపు తప్పడాన్ని డిస్ట్రాయ్ కమాండ్ యాక్టివేషన్ సిస్టమ్ గమనించింది. మొదటి దశలోనే మార్పులు గమనించడంతో రేంజ్ సేఫ్టీ ఆఫీసర్ రాకెట్ తమ అదుపు తప్పిపోతున్న సందేశాన్ని అందుకున్నారు.

52 -63 సెకండ్ల మధ్య రాకెట్ అదుపు తప్పింది. జరగబోతున్న ప్రమాదాన్ని శాస్త్రవేత్తలు పసిగట్టారు. అదే క్షణంలో రెండు, మూడు దశలలో కంట్రోల్ గైడెన్స్ నావిగేషన్ తొలిదశలో ఉండే స్ట్రాపాన్ మోటార్లకు అందే సంకేతాలు ఆగిపోవడాన్ని గమనించారు. అదుపుతప్పిన రాకెట్‌ను షార్ రేంజ్ సేఫ్టీ ఆఫీసర్ శ్రీవాత్సవ, ఆకాశంలోనే పేలిపోయేలా ఆదేశాలిచ్చారు. దాంతో.. శ్రీహరికోటకు 8 కిలోమీటర్ల ఎత్తున 63 సెకండ్ల మేర ప్రయాణించిన రాకెట్ తునాతునకలైంది. అగ్ని గోళాల శకలాలు బంగాళాఖాతంలో పడిపోయాయి.

జీశాట్-5పీ ఉపగ్రహం కూడా తునాతునకలైపోయింది. జీఎస్ఎల్‌వీ రాకెట్ ఇలా తొలిదశలోనే విఫలం కావడం ఇదే ప్రథమం. శనివారం నాటి ప్రయోగంలో తొలి దశ 226 సెకండ్ల వరకు ఆకాశంలో 115 కిలోమీటర్లు ప్రయాణించాల్సి ఉండగా 8 కిలోమీటర్ల ఎత్తులోనే వెళ్లి 47 సెకండ్ల తర్వాత అదుపుతప్పింది. ఇదే వైఫల్యానికి ప్రధాన కారణంగా మారింది.