ఐక్యంగా ఉంటే వైఎస్ జగన్ తెలంగాణలో అడుగుపెట్టలేడు: జీవన్ రెడ్డి

హైదరాబాద్: తెలంగాణకు సంబంధించిన కాంగ్రెస్ నేతలు అందరూ కలిసిమెలిసి ఉంటే మాజీ పార్లమెంటు సభ్యుడు వైఎస్ జగన్మోహన్ రెడ్డిని తెలంగాణలో అడుగు పెట్టనివ్వకుండా చూడవచ్చునని మాజీ మంత్రి జీవన్ రెడ్డి ఆదివారం తెలంగాణ కాంగ్రెస్ నాయకుల సమావేశంలో పేర్కొన్నారు. మంత్రి పదవులు తీసుకోవటం ద్వారా మంత్రులు తెలంగాణ అంశాన్ని, విద్యార్థులపై కేసుల ఎత్తివేత అంశాన్ని పక్కకు పెట్టారనే అభిప్రాయం తెలంగాణ ప్రజల్లో ఏర్పడుతుందన్నారు.

అందుకు మంత్రులు తెలంగాణ ఉద్యమంలో అందరికంటే ముందు ఉండటం ద్వారానే ఆ అపవాదును తొలగించుకోవాలని చెప్పారు. మంత్రులే ఉద్యమంలో ముందుండాలన్నారు. వారి నాయకత్వంలో పని చేస్తామని చెప్పారు. తెలంగాణ వచ్చినా ఆ క్రెడిట్ కాంగ్రెస్ పార్టీకే ఉంటుందని చెప్పారు. తెలంగాణకోసం పార్లమెంటులో బిల్లు పెట్టే విధంగా అందరూ కృషి చేయాలని మరో నాయకుడు గండ్ర వెంకటరమణారెడ్డి కోరారు. విద్యార్థులపై కేసులు ఎత్తివేయించాలని ఆయన డిమాండ్ చేశారు.