పదవులకై కాదు, తెలంగాణకై రాజీనామా చేయండి: ఎంపీ సర్వే సూచన

హైదరాబాద్: తెలంగాణకు కేంద్రం అనుకూలంగా లేకపోయినా, ఉద్యమంలో పాల్గొన్న విద్యార్థులపై కేసులు ఎత్తివేయక పోయినా అందరూ రాజీనామాకు సిద్ధంగా ఉండాలని పార్లమెంటు సభ్యుడు సర్వే సత్యనారాయణ ఆదివారం తెలంగాణ కాంగ్రెస్ నేతల సమావేశంలో సూచించారు. మంచి శాఖలు రాలేదని రాజీనామా చేయడం కాదని తెలంగాణ కోసం రాజీనామా చేయాలన్నారు. సభాపతి ఆమోదం పొందేలా రాజీనామా చేయాలని సూచించారు. తెలంగాణకు కేంద్రం అనుకూలంగా లేకుంటే ప్రజాప్రతినిధులంతా రాజీనామా చేయాలని మరో పార్లమెంటు సభ్యుడు పొన్నం ప్రభాకర్ అన్నారు.

అవసరమైతే సోమవారమే ముఖ్యమంత్రి కిరణ్ కుమార్ రెడ్డిని కలిసి రాజీనామా సమర్పించాలన్నారు. ఎవరైతే రాజీనామా చేయరో వారి పేర్లు బయట పెడతామన్నారు. మంత్రి పదవులు మాకు ముఖ్యం కాదని తెలంగాణే ముఖ్యమంత్రి మంత్రి శంకరరావు అన్నట్టు సమాచారం. విద్యార్థులపై కేసులు వెంటనే ప్రభుత్వం ఎత్తివేయాలని ఆయన డిమాండ్ చేశారు. విద్యార్థులపై కేసులు ఎత్తివేయక పోతే అందరూ రాజీనామా చేయాలన్నారు. అప్పుడు దానికి ప్రభుత్వమే బాధ్యత వహించాల్సి ఉంటుందన్నారు.