దాసరి, బాలయ్య పరమవీర చక్ర చిత్రకథను కాపీ కొట్టారా?

హైదరాబాద్: టాప్ హీరో బాలకృష్ణ హీరోగా, దర్శకరత్న దాసరి నారాయణరావు దర్శకత్వంలో ప్రసాద్ బాబు నిర్మిస్తున్న పరమ వీరచక్ర చిత్రం తనదేనంటూ తెలంగాణలోని మహబూబ్ నగర్ జిల్లాకు చెందిన శ్రీనివాస్ అనే యువకుడు ఆరోపిస్తున్నాడు. పరమ వీర చక్ర చిత్రం కథను హీరో, నిర్మాతలకు వినిపించానని శ్రీనివాస్ అంటున్నారు. తన స్టోరీని కాపీ చేసి పరమ వీర చక్ర చిత్రం తీస్తున్నారని ఆయన ఆరోపిస్తున్నారు. శ్రీనివాస్ మహబూబ్ నగర్ జిల్లా గద్వాలకు చెందిన వ్యక్తి. శ్రీనివాస్ అనే యువకుడితో తెలంగాణ టీవీ చానెల్ రాజ్ న్యూస్ మాట్లాడించింది.

గతంలో తన కథను తీసుకు వెళ్లి హీరో బాలకృష్ణకు చూపించానని చెప్పారు. ఆ తర్వాత ప్రసాద్ బాబుకు కూడా చూపించానన్నారు. తన కథను తీసుకొని రెండు రోజుల తర్వాత రమ్మన్నారని, రెండు రోజుల తర్వాత వెళితే కథ నచ్చలేదని ఆఫీసు బాయ్ తో చెప్పించారని ఆవేదన వ్యక్తం చేశారు. దానిని చెత్తబుట్టలో వేసినట్టు చెప్పారు. ప్రసాద్ బాబును విషయం అడిగితే దాసరి కథను నీవు కాపీ కొట్టావా, దాసరి నీ కథను కాపీ కొట్టారా అని ఎదురు ప్రశ్నించారన్నారు. బొబ్బిలి పులి చిత్రానికి సీక్వెల్ గా ఉన్న తన కథనే పరమ వీర చక్ర చిత్రంగా నిర్మిస్తున్నారని చెబుతున్నాడు.