విద్యార్థుల కేసులపై కాంగ్రెసు ఎంపీల దీక్ష మ్యాచ్ ఫిక్సింగ్: హరీష్ రావు

హైదరాబాద్: విద్యార్థులపై కేసులు ఎత్తివేయాలని సోమవారం నుండి దీక్ష చేస్తున్న పార్లమెంటు సభ్యుల దీక్షకు కాంగ్రెసు పార్టీ అధిష్టానం ఇంత తొందరగా స్పందించడాన్ని చూస్తుంటే ఇందులో మ్యాచ్ ఫిక్సింగ్ ఉన్నట్లు స్పష్టంగా కనిపిస్తోందని తెలంగాణ రాష్ట్ర సమితి నాయకుడు, సిద్దిపేట శాసనసభ్యుడు తన్నీరు హరీష్ రావు అన్నారు. విపక్షాలు శాసనసభను విద్యార్థుల కేసులు ఎత్తివేయాలని మూడు రోజులపాటు స్తంభింపజేసినా చలించని సర్కారు పార్లమెంటు సభ్యులు దీక్ష చేస్తే మాత్రం వెంటనే స్పందించాయన్నారు.

ఇదంతా తెలంగాణలో వారి క్రెడిబిలిటీ కోసమేనన్నారు. అయితే విద్యార్థులపై కేసులు ఎత్తివేసినందుకు ఆయన హర్షం వ్యక్తం చేశారు. విద్యార్థుల కేసుల ఎత్తివేత విషయంలో తెలంగాణకు చెందిన కాంగ్రెసు నాయకులు పట్టుదలతో ఉన్నట్టుగా తెలంగాణ సాధన కోసమూ అలాగే ఉండాలన్నారు. తెలంగాణ సాధనకు నిలబడండి అని సూచించారు. తెలంగాణ ఇచ్చేది తెచ్చేది మేమే అంటున్న కాంగ్రెసు తెలంగాణ కోసం రాజీనామాకు కూడా సిద్ధం కావాలన్నారు. తెలంగాణ రాకుంటే రాజీనామా చేస్తామని స్వయంగా వారే ప్రకటించారని, దానికి వారు కట్టుబడి ఉండాలన్నారు.