హద్దు మీరొద్దు: శ్రీకృష్ణ నివేదిక నేపథ్యంలో మీడియాకు కేంద్రం ఆంక్షలు

న్యూఢిల్లీ: తెలంగాణపై కేంద్ర ప్రభుత్వం నియమించిన శ్రీకృష్ణ కమిటీ నివేదిక సమర్పించనున్న నేపథ్యంలో కేంద్రం ఆంధ్ర ప్రదేశ్ మీడియాపై బుధవారం ఆంక్షలు విధించింది. మీడియాకి కొన్ని మార్దదర్శకాలు జారీ చేస్తున్నట్టు కేంద్ర మంత్రి అంబికా సోనీ ప్రకటించారు. మీడియా స్వయం నియంత్రణ పాటించాలని ఆమె సూచించారు. రాష్ట్ర మీడియాను సునిశితంగా పరిశీలిస్తున్నామన్నారు. ఊహాగానాలు, కథనాలు ప్రసారం చేయవద్దని కోరారు. వాటిపై ఆంక్షలు విధిస్తున్నట్టు చెప్పారు. ప్రభుత్వం అధికారికంగా ధృవీకరించిన కథనాలను మాత్రమే ప్రసారం చేయాలని ఆమె సూచించారు.

శ్రీకృష్ణ కమిటీ నివేదిక అంశాలను వెల్లడి చేయడానికి ప్రత్యేక నోడల్ అధికారిని నియమించామని ఆమె చెప్పారు. కేంద్ర హోంమంత్రిత్వ శాఖ ఆధ్వర్యంలో నోడల్ అధికారి పని చేస్తారని చెప్పారు. హోంమంత్రి నోడల్ అధికారికి అనుమతించినట్లు చెప్పారు. అంబికా సోనీ అంతకుముందు కేంద్ర మంత్రి చిదంబరంతో సమావేశమయ్యారు. తెలంగాణ అంశం, శ్రీకృష్ణ కమిటీ నివేదికపై చర్చించారు.