తెలంగాణకు కేంద్ర ప్రభుత్వం విరుగుడు కనిపెట్టిందా?

హైదరాబాద్: తెలంగాణ రాష్ట్ర ఏర్పాటు డిమాండుకు కేంద్ర ప్రభుత్వం విరుగుడు కనిపెట్టిందనే ఊహాగానాలు చెలరేగుతున్నాయి. శ్రీకృష్ణ కమిటీ నివేదిక సమర్పించనున్న నేపథ్యంలో విడుదలైన ఓ సర్క్యులర్ ఈ ఊహాగానాలకు తావిస్తోంది. వెనుకబడిన తెలంగాణ ప్రాంతాన్ని ఇతర ప్రాంతాలకు దీటుగా అభివృద్ధి చేయాలంటే మీమీ శాఖల తరపున ఎలాంటి ప్రత్యేక ప్యాకేజీలు అవసరమో, వాటికి ఎంత ఖర్చవుతుందో సత్వరమే స్పందించి నివేదిక పంపాల్సిందిగా రాష్ట్ర ప్రభుత్వంలోని అభివృద్ధి శాఖలకు కేంద్ర ప్రణాళికా సంఘం సర్క్యులర్లు పంపించింది. వ్యవసాయం, నీటి పారుదల, గ్రామీణాభివృద్ధి, జాతీయ రహదారులు వంటి కీలక అభివృద్ధి శాఖలకు పంపించిన సర్క్యులర్లలో 'తెలంగాణ", 'రాయలసీమ", 'కోస్తాంధ్ర" అని ప్రత్యేకంగా పేర్కొంటూనే అన్ని ప్రాంతాల అభివృద్ధి విషయంలో సమతుల్యత సాధించేందుకు ప్రతిపాదనలు సమర్పించాలని కేంద్రం కోరింది.

రాష్ట్ర ప్రభుత్వం కూడా తక్షణం స్పందించి ఆ పనిలో నిమగ్నమైంది. ప్రణాళికా సంఘం సూచనల మేరకు రాష్ట్ర ప్రణాళికా శాఖ సవివరమైన నివేదిక కోసం అన్ని జిల్లాల అధికారులతో వీడియో కాన్ఫరెన్స్‌కు సన్నాహాలు చేస్తోంది. ఏయే ప్రాంతాలు ఏయే రంగాల్లో ఏ మేరకు వెనుకబడ్డాయి, ఆ అసమానతల్ని సరిదిద్దడానికి ఏం చేస్తే బాగుంటుందో ఒక నివేదికను క్రోడీకరించి, దాన్ని ప్రత్యేక వాదనలకు విరుగుడుగా ప్రతిపాదించనున్నదా అనే సందేహాలకు ఈ కసరత్తు ఇది అవకాశం కలిగిస్తోందని అంటున్నారు.