నివేదిక ఇవ్వడంతో మా పని పూర్తయింది: జస్టిస్ శ్రీకృష్ణ

న్యూఢిల్లీ: నివేదిక ఇవ్వడంతో తమ పని పూర్తయిందని జస్టిస్ శ్రీకృష్ణ గురువారం కేంద్ర హోంమంత్రి చిదంబరానికి నివేదిక సమర్పించిన అనంతరం విలేకరుల ప్రతినిధులతో మాట్లాడుతూ చెప్పారు. మధ్యాహ్నం 2.20 నిమిషాల సమయంలో వారు తమ నివేదికను చిదంబరానికి సమర్పించారు. అనంతరం విలేకరులతో మాట్లాడారు. నివేదికను 2 సంపుటాలుగా సమర్పించామన్నారు. నివేదికలోని అంశాలపై అడగవద్దని విలేకరులను కోరారు.

నివేదికలోని అంశాలను ప్రభుత్వమే చూసుకుంటుందని చెప్పారు. జనవరి 6న కేంద్రం రాష్ట్రంలోని 8 పార్టీలతో సంప్రతింపులు జరిపిన తర్వాత నివేదికను బహిర్గతం చేస్తుందన్నారు. పార్టీలతో సంప్రదింపులు జరిపిన రోజే కేంద్రం నివేదికను బహిర్గతం చేస్తుందన్నారు. అదే రోజు ఇంటర్నెట్ లో కూడా పెడుతున్నట్లు చెప్పారు. కాగా కేంద్రం ప్రభుత్వం గురువారమే రాష్ట్రంలోని ఆయా పార్టీలకు జనవరి 6న రావడానికి ఈరోజే ఆహ్వానిస్తున్నట్లు చిదంబరం చెప్పారు.