చంద్రబాబుకు వైయస్ జగన్ షాక్: టిడిపికి మాకినేని రాజీనామా

హైదరాబాద్: గుంటూరు జిల్లాలో తెలుగుదేశం పార్టీ అధ్యక్షుడు నారా చంద్రబాబునాయుడికి షాక్ తగిలింది. గుంటూరు జిల్లాకు చెందిన మాజీ మంత్రి మాకినేని పెదరత్తయ్య శుక్రవారం ఉదయం తెలుగుదేశం పార్టీకి రాజీనామా చేశారు. ఆయన మాజీ పార్లమెంటు సభ్యుడు వైయస్ జగన్ పార్టీలో చేరనున్నారు. తెలుగుదేశం పార్టీకి రాజీనామా చేసిన తర్వాత ఆయన హైదరాబాదులో వైయస్ జగన్ ను కలిశారు. తాను వైయస్ జగన్ పార్టీలో చేరుతున్నట్లు ఆయన ప్రకటించారు. అయితే, ఇది ఊహించని పరిణామేమీ కాదు. ఇంతకు ముందే ఆయన వైయస్ జగన్ పార్టీలో చేరనున్నట్లు తెలిపారు.

వైయస్ జగన్ పార్టీలోకి మాకినేని పెద రత్తయ్యను తెచ్చేందుకు నెల్లూరు జిల్లాకు చెందిన తెలుగుదేశం అసమ్మతి శానససభ్యుడు నల్లపురెడ్డి ప్రసన్నకుమార్ రెడ్డి మధ్యవర్తిత్వం నెరిపారు. మాకినేని పెదరత్తయ్యకు వైయస్ జగన్ గుంటూరు జిల్లా బాధ్యతలు అప్పగించే అవకాశం ఉంది. నిబద్దత గల నాయకుడిగా పేరున్న మాకినేని పెదరత్తయ్య రాజీనామా తెలుగుదేశం పార్టీకి కొంత మేర దెబ్బనే అని చెప్పవచ్చు.