తెలంగాణ రాష్ట్ర ఏర్పాటు కోసం ఎదురు చూస్తున్నాం: సుష్మా స్వరాజ్

న్యూఢిల్లీ: తెలంగాణ రాష్ట్ర ఏర్పాటు కోసం ఆతృతతో ఎదురుచూస్తున్నామని లోక్‌సభలో ప్రతిపక్షనేత సుష్మాస్వరాజ్‌ తెలిపారు. శ్రీకృష్ణ కమిటీ తన నివేదికను కేంద్రానికి సమర్పించిన నేపథ్యంలో ఆమె ఈ విషయాన్ని తన ట్విట్టర్‌లో పేర్కొన్నారు. మరోవైపు శ్రీకృష్ణ కమిటీ సూచనలతో సంబంధం లేకుండా తెలంగాణ రాష్ట్రాన్ని ఏర్పాటు చేయాలని బిజెపి అధికార ప్రతినిధి నిర్మలా సీతారామన్‌ డిమాండ్‌ చేశారు. మొదటినుంచి రాష్ట్ర ఏర్పాటుకు తమ పార్టీ అనుకూలంగానే ఉందని గుర్తు చేశారు. పార్లమెంటులో తెలంగాణ బిల్లు ప్రవేశపెట్టడం ద్వారా రాజకీయ పరిష్కారం కనుగొనాల్సిన అవసరముందని స్పష్టం చేశారు.

తెలంగాణ రాష్ట్ర డిమాండ్‌పై జనవరి 6న రాజకీయ పార్టీలతో సమావేశం నిర్వహించిన అనంతరం ప్రభుత్వం'సముచిత' నిర్ణయం తీసుకుంటుందని కాంగ్రెస్‌ పేర్కొంది. 'తెలంగాణతో సహా చిన్న రాష్ట్రాల ఏర్పాటుకు కాంగ్రెస్‌ వ్యతిరేకం కాదు. శ్రీకృష్ణ కమిటీ తన నివేదికను సమర్పించింది. రాజకీయ పార్టీలతో నిర్వహించే సమావేశంలో ప్రభుత్వంసరైన నిర్ణయం తీసుకుంటుందని భావిస్తున్నాం' అని పార్టీ అధికార ప్రతినిధి షకీల్‌ అహ్మద్‌ పేర్కొన్నారు. ఆయన గురువారమిక్కడ విలేకరులతో మాట్లాడారు.