చంద్రబాబు దీక్షపై అనుమానాలు: జగన్ వర్గం నేత గోనె ప్రకాశ్‌రావు

శ్రీకాకుళం: రైతుల కోసమంటూ తెలుగుదేశం పార్టీ అధ్యక్షుడు, మాజీ ముఖ్యమంత్రి నారా చంద్రబాబునాయుడు చేపట్టిన దీక్షపై కొన్ని అనుమానాలు ఉన్నాయని మాజీ పార్లమెంటు సభ్యుడు వైఎస్ జగన్మోహన్‌రెడ్డి వర్గం నేత గోనె ప్రకాశ్‌రావు ఆదివారం శ్రీకాకుళం జిల్లాలో వ్యాఖ్యానించారు. అంతేగాక తెలంగాణ ప్రకటించాలంటూ 2009లో తెలంగాణ రాష్ట్ర సమితి అధ్యక్షుడు కె చంద్రశేఖరరావు చేసిన దీక్ష పెద్ద బూటకమని ఆయన కొట్టి పారేశారు.

కేసిఆర్ దీక్ష బూటకమని చెప్పడానికి తన దగ్గర పూర్తి ఆధారాలు కూడా ఉన్నాయని గోనె ప్రకాశ్‌రావు చెప్పారు. ప్రత్యేక తెలంగాణ రాష్ట్రం అనగానే వచ్చేది కాదని గోనె అన్నారు. ప్రత్యేక తెలంగాణ రాష్ట్రం ఏర్పడాలంటే అత్యధిక పార్లమెంటు సభ్యుల ఆమోదం ఉండాలని ఆయన అన్నారు. పార్లమెంటులో మెజారిటీ పార్లమెంటు సభ్యులు అనుకూలంగా ఉంటేనే తెలంగాణ సాధ్యమవుతుందన్నారు.