తెలంగాణకు ప్రత్యేక ప్యాకేజీ అరిగిపోయిన రికార్డులు: ఎమ్మెల్యే హరీష్‌రావు

హైదరాబాద్: ప్రత్యేక తెలంగాణ కాకుండా కేంద్రం ప్రభుత్వం పెట్టే ఏ ప్రతిపాదనకూ మేము ఒప్పుకునేది లేదని తెలంగాణ రాష్ట్ర సమితి సీనియర్ నాయకుడు, సిద్దిపేట శాసనసభ్యుడు తన్నీరు హరీశ్‌రావు ఆదివారం ఓ ఛానల్‌ కార్యక్రమంలో ఫోన్లో మాట్లాడారు. తెలంగాణ ఒక్కటే తమ లక్ష్యమని కేంద్రం వేరే ఏ ప్రతిపాదనలు పెట్టినా మేం తిరస్కరిస్తామన్నారు. ఈ నెల 6వ తారీఖున ఏం జరుగుతుందో చూస్తామన్నారు. కొన్ని పార్టీలు తెలంగాణ అంశాన్ని కాలాయాపన చేయడానికి చూస్తున్నారన్నారు.

మైనారిటీలు కూడా ప్రత్యేక తెలంగాణకు కట్టుబడి ఉన్నారన్నారు. మైనారిటీల్లో ఎలాంటి అభద్రతా భావం లేదన్నారు. రాజ్యాంగ బద్దత, పెద్దమనుషుల ఒప్పందం, ప్రభుత్వ చట్టాలు ఇవన్నీ అరిగిపోయిన రికార్డులన్నారు. ప్రత్యేక రాష్ట్రం తద్వారా ఆత్మగౌరవమే తమ లక్ష్యమన్నారు. కాలాయాపన కోసమే కేంద్రం అనవసర ప్రతిపాదనలు చేయచూస్తుందన్నారు.