బావ చంద్రబాబు చేసే ప్రతి ఉద్యమానికి అండగా ఉంటా: బాలకృష్ణ

చిత్తూరు: తన బావ, తెలుగుదేశం పార్టీ అధ్యక్షుడు నారా చంద్రబాబునాయుడు చేసే ప్రతి ఉద్యమానికి తాను అండగా ఉంటానని ప్రముఖ సినీ హీరో నందమూరి బాలకృష్ణ సోమవారం శ్రీకాళహస్తిలో విలేకరులతో అన్నారు. తెలుగుదేశం పార్టీ ఎప్పుడూ ప్రజల పక్షమే ఉంటుందన్నారు. ప్రజలకోసం, రైతులకోసం బావ చేసే ప్రతి ఉద్యమంలో ఆయనకు అండగా ఉంటానని చెప్పారు. దాసరి నారాయణరావు దర్శకత్వంలో ఈ సంక్రాంతికి విడుదల కానున్న తన చిత్రం పరమవీర చక్ర విజయవంతం కావాలని ఆయన శ్రీకాళహస్తి దేవాలయంలో ప్రత్యేక పూజలు చేశారు.

2010వ సంవత్సరంలో సింహా వంటి సూపర్ డూపర్ హిట్ కొట్టిన బాలకృష్ణ మంచి ఉత్సాహంగా ఉన్నారు. చాలా రోజుల తర్వాత సమరసింహారెడ్డి, నరసింహనాయుడు తరహా హిట్ ఆయనకు దొరికింది. సంక్రాంతికి విడుదలైన బాలకృష్ణ చిత్రాలు అఖండ విజయాన్ని సాధిస్తాయి. పరమవీర చక్ర కూడా ఆ తరహా విజయం సాధిస్తుందని బాలకృష్ణ ఆశాభావం వ్యక్తం చేశారు. ఎన్టీఆర్ బొబ్బిలిపులికి సీక్వెన్సు చిత్రంగా పరమవీర చక్ర ఉంటుందనేది కూడా అందరిలో ఆత్రుత నెలకొల్పుతుంది.