కిరణ్ కుమార్ రెడ్డితో చిరంజీవి భేటీ ఆంతర్యం ఏమిటి?

హైదరాబాద్: ముఖ్యమంత్రి కిరణ్‌కుమార్‌రెడ్డితో ఆదివారం ప్రజారాజ్యం పార్టీ అధ్యక్షుడు చిరంజీవి, ఎంఐఎం నేతలు అసదుద్దీన్‌, అక్బరుద్దీన్‌లు వేర్వేరుగా భేటీ అయ్యారు. రాష్ట్రంలో నెలకొన్న రాజకీయ పరిస్థితుల నేపథ్యంలో వీరి భేటీకి ప్రాధాన్యం ఏర్పడింది. చిరంజీవి కిరణ్ కుమార్ రెడ్డి కలవడంపై పలు ఊహాగానాలు చెలరేగుతున్నాయి. శ్రీకృష్ణ కమిటీ నివేదిక నేపథ్యంలో ప్రభుత్వానికి తలెత్తే తలనొప్పులను ఎదుర్కోవడానికి చిరంజీవి కిరణ్ కుమార్ రెడ్డికి స్నేహ హస్తం అందించనున్నట్లు చెప్పినట్లు తెలుస్తోంది.సీనియర్‌ నేత సి.రామచంద్రయ్యతో కలిసి చిరంజీవి ముఖ్యమంత్రి క్యాంపు కార్యాలయానికి విచ్చేశారు.

పంట నష్టానికి రైతులకు ఇస్తున్న పరిహారాన్ని రూ.పది వేలకు పెంచాలని కోరినట్లు తెలిసింది. కేంద్రం నుంచి ఆర్థిక సాయం వచ్చిన తర్వాత మరికొంత సాయం అందించేందుకు కృషి చేస్తామని సీఎం అన్నట్లు సమాచారం. శ్రీకృష్ణ కమిటీ నివేదిక, ఢిల్లీలో కేంద్ర హోంశాఖ నిర్వహించనున్న అఖిలపక్ష సమావేశానికి కొన్ని పార్టీలు దూరంగా ఉండటం, రాష్ట్రంలో రాజకీయ పరిస్థితులపైనే ప్రధానంగా వీరు చర్చించుకున్నట్లు తెలిసింది. రైతు సమస్యలపైనే ముఖ్యమంత్రిని కలిసినట్లు పార్టీ వర్గాలు పేర్కొంటున్నా ఇది ప్రధాన అంశం కాదని తెలుస్తోంది. ఎంఐఎం నేతలతో ఏం చర్చించారన్నది తెలియరాలేదు.