టిడిపి ఎమ్మెల్యే ఎర్రబెల్లి దయాకర రావుకు డిప్యూటీ స్పీకర్ నోటీసులు

హైదరాబాద్: తెలుగుదేశం శాసనసభ్యుడు ఎర్రబెల్లి దయాకర రావుకు శాసనసభ డిప్యూటీ స్పీకర్ నాదెండ్ల మనోహర్ నోటీసులు జారీ చేశారు. శ్రీకృష్ణ కమిటీ నివేదిక వెల్లడై తెలంగాణ ఉద్యమం ఊపందకుంటుందని భావిస్తున్న తరుణంలో ఆయన ఈ నోటీసులు జారీ చేశారు. ఎర్రబెల్లి దయాకర్ రావు ఎమ్మెల్యే క్వార్టర్స్‌లోని తన క్వార్టర్‌ను తెలంగాణ జెఎసి కార్యాలయానికి కేటాయించడంపై వివరణ ఇవ్వాలని ఆయన దయాకర్ రావును ఆదేశించారు. ఎమ్మెల్యే క్వార్టర్స్ అనేది నివాసానికి ఉద్దేశించింది మాత్రమేనని, కార్యాలయాల ఏర్పాటు కోసం కాదని ఆయన అన్నారు. అలాగే, ఎమ్మెల్యే క్వార్టర్స్‌లో ధర్నాలను, దీక్షలను నిషేధిస్తూ ఆయన ఆదేశాలు జారీ చేశారు.

కాగా, శాసనసభలో కదలికలపై కూడా ఆయన ఆంక్షలు విధించారు. శాసనసభ ఆవరణలో మీడియా సమావేశాలకు ప్రత్యేకంగా ఓ వేదికను ఏర్పాటు చేయాలని ఆయన నిర్ణయించారు. మీడియాతో ఎక్కడపడితే అక్కడ మాట్లాడకుండా ఆంక్షలు విధిస్తున్నారు. శానససభ్యులు, ఎమ్మెల్సీలు కానివారు శాసనసభ ఆవరణలోకి రాకుండా నిషేధం విధిస్తున్నారు. శానససభ సమావేశాలు లేని సమయాల్లో కూడా మీడియా ప్రతినిధులకు పాసులను అనివార్యం చేస్తూ ఆదేశాలు జారీ చేశారు.