శ్రీకృష్ణ కమిటీ నివేదికపై మాట్లాడొద్దు: పార్టీ నేతలకు డిఎస్ ఆదేశం

హైదరాబాద్: తెలంగాణ అంశంపై కేంద్రం నియమించిన శ్రీకృష్ణ కమిటీ నివేదికపై కాంగ్రెస్ పార్టీ నేతలు ఎవరూ కూడా తమ తమ ఇష్టానుసారంగా వ్యాఖ్యలు చేయరాదని ప్రదేశ్ కాంగ్రెస్ కమిటీ అధ్యక్షుడు డి శ్రీనివాస్ సోమవారం మీడియా సమావేశంలో తమ పార్టీ కార్యకర్తలకు సూచించారు. నివేదిక బహిర్గతం అయ్యే వరకు ఎవరూ మాట్లాడకూడదన్నారు. జనవరి 6వ తేదిన హోంమంత్రి చిదంబరం ఏర్పాటు చేసిన అఖిలపక్ష సమావేశానికి కాంగ్రెస్ పార్టీనుండి కావూరి సాంబశివరావు, ఉత్తమ్‌కుమార్ రెడ్డి వెళ్లనున్నట్లు తెలిపారు.

శ్రీకృష్ణ కమిటీ నివేదికను గౌరవపదంగా ఆయా పార్టీలకు అందజేయడానికే చిదంబరం అఖిలపక్షాన్ని ఏర్పాటు చేశారన్నారు. అయితే ఆ తర్వాత అఖిలపక్షానికి ఏ పార్టీనుండి ఎంతమంది వెళతారనేది తమకు సంబంధం లేదన్నారు. కాగా మాజీ పార్లమెంటు సభ్యుడు వైయస్ జగన్మోహన్‌రెడ్డి చేపడుతున్న ఓదార్పు యాత్రలో పాల్గొన్న నేతలపై పార్టీ సరియైన సమయంలో సరియైన నిర్ణయం తీసుకుంటామని చెప్పారు. 2014లో మళ్లీ కాంగ్రెస్ పార్టీయే అధికారంలోకి వస్తుందని ఆయన ఆశాభావం వ్యక్తం చేశారు.