ఓదార్పు యాత్ర కోసం హైదరాబాద్ నుంచి బయలుదేరిన జగన్

విశాఖపట్నం: మాజీ పార్లమెంటు సభ్యుడు వైయస్ జగన్మోహన్‌రెడ్డి ఓదార్పు యాత్ర సోమవారం నుండి విశాఖపట్నంలో ప్రారంభం అవుతుంది. విశాఖ జిల్లాలో 3వ తేదినుండి 13వ తేది వరకు పదిరోజులు తన ఓదార్పు యాత్ర ఉంటుందని జగన్ పదిహేను రోజుల క్రితమే ప్రకటించారు. ఆయన హైదరాబాదునుండి కింగ్‌ఫిషర్ విమానంలో సోమవారం ఉదయం బయలుదేరారు. 11గంటల ప్రాంతంలో ఆయన వైజాగ్ చేరుకున్నారు. అక్కడినుండి ఆయన ఓదార్పు యాత్ర ప్రారంభమవుతుంది.

కాంగ్రెస్ పార్టీని వీడాక జగన్ చేపడుతున్న తొలి ఓదార్పు యాత్ర కాబట్టి అందరిలోనూ ఆతృత నెలకొన్నది. ఎమ్మెల్యే కన్నబాబు, మాజీ మంత్రి కొణతాల రామకృష్ణ, పార్లమెంటు సభ్యుడు సబ్బం హరి జగన్ ఓదార్పుకు మద్దతు ప్రకటిస్తామని ఇంతకుముందే స్పష్టం చేశారు. ఇక 10 రోజుల పాటు జరిగే ఈ ఓదార్పు యాత్రలో 795 కిలోమీటర్లు వైయస్ జగన్ తిరుగుతారు. దివంగత ముఖ్యమంత్రి వైయస్ రాజశేఖరరెడ్డి ఆకస్మిక మరణాన్ని తట్టుకోలేక జిల్లాలో మరణించిన 18 మంది కుటుంబ సభ్యులను ఆయన పరామర్శించనున్నారు. జిల్లాలో 103 వైయస్ రాజశేఖరరెడ్డి విగ్రహాలను ఆయన ఆవిష్కరించనున్నారు.