మద్దెలచెర్వు సూరిపై ప్రత్యర్థుల కాల్పులు, కోమాలో అపోలోలో చేరిక

హైదరాబాద్ : తీవ్ర గాయాలతో పరిటాల రవి హత్య కేసులో నిందితుడు మద్దెలచెర్వు సూర్యనారాయణ రెడ్డి అలియాస్ మద్దెలచెర్వు సూరి తీవ్ర గాయాలతో హైదరాబాదులోని అపోలో ఆస్పత్రిలో చేరారు. ఆయన పరిస్థితి ఆందోళనకరంగా ఉంది. ఆయన కోమాలో ఉన్నారు. సూరి ప్రత్యర్థుల కాల్పుల్లో గాయపడ్డారా, రోడ్డు ప్రమాదంలో గాయపడ్డారా అనే అనుమానాలు తొలుత వ్యక్తమయ్యాయి. వివరాలు చెప్పడానికి ఎవరూ అందుబాటులో లేరు. అయితే గుర్తు తెలియని వ్యక్తుల కాల్పుల్లో అతను గాయపడినట్లు తెలుస్తోంది.

స్కోడా కారులో ఆయన ఇంటికి వెళ్తుండగా ఈ సంఘటన జరిగింది. సూరి తలకు తీవ్రమైన గాయాలయ్యాయి. సూరిని జూబ్లీహిల్స్‌ అపోలో ఆస్పత్రిలో చేర్చారు. హైదరాబాదులోని జూబ్లీహిల్స్ రోడ్డు నెంబర్ 13లో ప్రత్యర్థులు ఆయనపై కాల్పులు జరిపినట్లు సమాచారం. పక్కా సమాచారంతోనే సూరిపై దాడి జరిగినట్లు తెలుస్తోంది. సూరితో పాటు ఆయన అనుచరులు ముగ్గురు ఉన్నట్లు తెలుస్తోంది. గాయపడిన సూరిని తొలుత స్థానికులు ఎవరూ గుర్తించలేదు. బెంగళూర్ నుంచి వచ్చిన ఆయన గత కొద్ది రోజులుగా హైదరాబాదులో ఉంటున్నట్లు సమాచారం.