సుద్దాల దేవయ్య డైలమా: టిడిపిలోనే ఉంటానన్న వేణుగోపాలాచారి

హైదరాబాద్: తాము పార్టీకి రాజీనామా చేసి తెలంగాణ రాష్ట్ర సమితి (తెరాస)లో చేరుతున్నట్లు వచ్చిన వార్తలను తెలుగుదేశం పార్టీ శాసనసభ్యులు సుద్దాల దేవయ్య, ఎస్ వేణుగోపాలాచారి ఖండించారు. తాము పార్టీలోనే ఉంటామని వారు చెప్పారు. తమ నాయకుడు చంద్రబాబేనని వారు చెప్పారు. తెలంగాణ అంశంపై పార్టీకి రాజీనామా చేయాలని నిర్ణయించుకున్న పోచారం శ్రీనివాస్ రెడ్డి, సుద్దాల దేవయ్య, వేణుగోపాలాచారిలకు నచ్చజెప్పడానికి రంగంలోకి దిగిన సీనియర్లు నాగం జనార్దన్ రెడ్డి, తుమ్మల నాగేశ్వర రావు బుజ్జగింపులు కొంత మేరకు ఫలించినట్లే చెప్పాలి.

తాను తెలుగుదేశంలోనే ఉంటానని సుద్దాల దేవయ్య హైదరాబాదు మీడియాతో చెప్పినప్పటికీ కరీంనగర్ జిల్లా మీడియాతో మాత్రం ఆయన మరో రకంగా మాట్లాడుతున్నట్లు తెలుస్తోంది. అయితే, తాను తెలుగుదేశం పార్టీని వీడిపోయే అవకాశం ఉన్నట్లు ఆయన అనధికారికంగా చెబుతున్నట్లు తెలుస్తోంది. తెలంగాణపై పార్టీ అధ్యక్షుడు నారా చంద్రబాబునాయుడి రెండు కళ్ల సిద్ధాంతం తెలంగాణ నాయకులను ఇబ్బందుల్లో పెడుతోంది. దీంతో వారు పార్టీలో ఉండే విషయంపై పునరాలోచన చేస్తున్నట్లు సమాచారం.