శ్రీకృష్ణ కమిటీ సభ్యుల ప్రాసిక్యూషన్‌కు తెలంగాణ లాయర్ల డిమాండ్

హైదరాబాద్: తెలంగాణ అంశంపై కేంద్రం నియమించిన శ్రీకృష్ణ కమిటీ సభ్యులను ప్రాసిక్యూట్ చేయాలని తెలంగాణ లాయర్లు సోమవారం డిమాండ్ చేశారు. శ్రీకృష్ణ కమిటీ సభ్యులు తమ నివేదికపై పలుమార్లు మీడియాకు ఇంటర్వ్యూలు ఇవ్వడం, వారి వ్యాఖ్యలు తెలంగాణకు వ్యతిరేకంగా ఉండటాన్ని వారు తప్పు పట్టారు. నివేదిక ఇవ్వడం వరకే వాళ్ల బాధ్యత అని, అయితే వారి వ్యాఖ్యలు తెలంగాణకు వ్యతిరేకంగా నివేదిక ఉన్నట్టు వ్యవహరించడం శోచనీయమన్నారు.

కమిటీ సభ్యులను ప్రాసిక్యూట్ చేయడానికి ప్రధానమంత్రి మన్మోహన్‌సింగ్‌కు లేఖ రాస్తామని చెప్పారు. తమ లేఖకు ప్రధానమంత్రి స్పందించకుంటే తెలంగాణ లాయర్లందరం కలిసి న్యాయ పోరాటానికి సిద్ధపడతామని హెచ్చరించారు. శ్రీకృష్ణ కమిటీ పద్ధతి భారతీయ అధికార రహస్యాల పరిరక్షణ చట్టం ప్రకారం నేరం కిందకు వస్తుందని చెప్పారు.