శ్రీకృష్ణ కమిటీ నివేదికపై ఊహించుకుంటున్నారు: ఉత్తమ్ కుమార్ రెడ్డి

హైదరాబాద్: శ్రీకృష్ణ కమిటీ నివేదికపై ఊహించుకుంటున్నారని కాంగ్రెసు తెలంగాణ ప్రాంత శాసనసభ్యుడు ఉత్తమ్ కుమార్ రెడ్డి అన్నారు. శ్రీకృష్ణ కమిటీ నివేదికపై ఈ నెల 6వ తేదీన జరిగే అఖిల పక్ష సమావేశానికి రాష్ట్ర కాంగ్రెసు కసరత్తు ప్రారంభించింది. ఇందులో భాగంగా సోమవారం ఉత్తమ్ కుమార్ రెడ్డి, పార్టీ పార్లమెంటు సభ్యుడు కావూరి సాంబశివ రావు ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ తో భేటీ అయ్యారు. భేటీ అనంతరం కావూరి సాంబశివ రావు మీడియాతో మాట్లాడకుండా వెళ్లిపోయారు. 6వ తేదీ అఖిల పక్ష సమావేశాన్ని కొంత మంది ఎందుకు వ్యతిరేకిస్తున్నారో అర్థం కావడం లేదని ఉత్తమ్ కుమార్ రెడ్డి అన్నారు.

6వ తేదీ సమావేశంలో శ్రీకృష్ణ కమిటీ నివేదికను బహిర్గతం చేస్తారని, దానిపై అదే రోజు చర్చ జరగదని ఆయన అన్నారు. గతంలో కూడా పార్టీ నుంచి ఇద్దరేసి ప్రతినిధులను సమావేశానికి పిలిచారని, ఇప్పుడు కూడా ఇద్దరేసి ప్రతినిధులను ఆహ్వానించడం సరైందేనని ఆయన అన్నారు. తాను వ్యక్తిగతంగా తెలంగాణకు కట్టుబడి ఉన్నట్లు ఆయన తెలిపారు. గత సమావేశానికి కాంగ్రెసు తరఫున తెలంగాణకు చెందిన ఉత్తమ్ కుమార్ రెడ్డి, సీమాంధ్రకు చెందిన కావూరి సాంబశివ రావు హాజరయ్యారు. ఇప్పుడు కూడా వారినే పిసిసి కేంద్ర హోం మంత్రి పి. చిదంబరం ఏర్పాటు చేసిన అఖిల పక్షసమావేశానికి పంపే అవకాశాలున్నాయి.