భాను కిరణ్ గ్యాంగ్ వెనక మంత్రి కుమారుడు కార్తిక్ రెడ్డి?

హైదరాబాద్‌: మద్దెలచెర్వు సూరి హత్య కేసులో ప్రదాన నిందితుడు భాను కిరణ్‌కు మంత్రి కుమారుడు అత్యంత సన్నిహితుడని ఎబిఎన్ ఆంధ్రజ్యోతి టీవీ చెనెల్ ఓ వార్తాకథనాన్ని ప్రసారం చేసింది. సూరి అనుచరులు భాను కిరణ్, మధుసూదన్ రెడ్డి, ప్రదీప్ రెడ్డిలతో కూడిన గ్యాంగ్‌తో కార్తిక్ రెడ్డికి సన్నిహిత సంబంధాలున్నాయని ఆ వార్తాకథనం ఆరోపణ. ఆ టీవీచ చానెల్ కథనం ప్రకారం - కార్తిక్ రెడ్డి అండదండలతో ఆ గ్యాంగ్ అనేక వివాదాల్లో తలదూర్చి, సెటిల్మెంట్లు చేస్తూ వస్తోంది. ఇటీవల విజయవాడలో ఓ పారిశ్రామికవేత్త ఆస్తి తగాదాలతో తలదూర్చిన వ్యవహారంలో భాను కిరణ్ ప్రధాన పాత్ర పోషించాడు. రాత్రికి రాత్రి సంస్థ డైరెక్టర్లను మార్చేశారు. ఓ డైరెక్టర్‌గా భాను కిరణ్ పేరు కూడా చేర్చారు. కార్తిక్ రెడ్డి అండదండలతో ఆ వ్యవహారమంతా నడిచింది. ప్రదీప్ రెడ్డి కార్తిక్ రెడ్డి మిత్రుడు. అతను హైదరాబాద్ వచ్చినప్పుడు మంత్రి ఇంట్లోనే ఉంటాడు. మూడు రోజుల క్రితం హైదరాబాద్ వచ్చిన ప్రదీప్ రెడ్డి ప్రస్తుతం మంత్రిని ఇంట్లోనే ఉన్నాడని టీవీ చానెల్ కథనం.

భాను కిరణ్ ముఠా సూరి పేరుతో సెటిల్మెంట్లు చేస్తూ వచ్చిందని తెలుస్తోంది. ఈ సెటిల్మెంట్ల వ్యవహారంపై సూరి భాను కిరణ్‌ను పలు మార్లు హెచ్చరిస్తూ వచ్చాడు. తన ప్రమేయం లేదని, తన పేరు మీద డబ్బులు వసూలు చేస్తున్నారని సూరి జైల్లో ఉన్నప్పుడు చాలా సార్లు చెప్పాడు. ఖమ్మం జిల్లాలో భానుకు గన్ లైసెన్స్ ఇప్పించింది కూడా కార్తిక్ రెడ్డేనని అంటున్నారు. ఈ సెటిల్మెంట్ల వ్యవహారంలో సూరి నుంచి తమకు ప్రమాదం తప్పదని భావించిన భాను, మధుసూదన్ కలిసే సూరిని మట్టుబెట్టి ఉంటారని అనుమానిస్తున్నారు. ఇందులో సూరి మరో అనుచరుడు వాసుదేవ రెడ్డి పాత్ర కూడా ఉందని అనుమానిస్తున్నారు. వాసుదేవ రెడ్డి జూబ్లీహిల్స్‌ కారు బాంబు కేసులో నిందితుడు. మధుసూదన్ పోలీసులతో చెప్పిన విషయాలు పలు అనుమానాలకు తావిస్తోందని అంటున్నారు. అయితే, సూరి హత్య వ్యవహారంలో మంత్రి కుమారుడు కార్తిక్ రెడ్డి పాత్ర ఉందని చెప్పలేమని, అయితే తమకు అతని అండ ఉందనే దీమా మాత్రం భానుకు ఉండవచ్చునని ఆంధ్రజ్యోతి టీవీ చానెల్ వ్యాఖ్యానించింది.