మద్దెలచెర్వు సూరి అక్కడికక్కడే మరణించాడు: నారాయణ రెడ్డి

హైదరాబాద్‌: మద్దెలచెర్వు సూర్యనారాయణ సంఘటన స్థలంలోనే మృతి చెందాడని ఉస్మానియా ఆస్పత్రి ఫోరెన్సిక్‌ నిపుణుడు డాక్టర్‌ నారాయణరెడ్డి తెలిపారు. తల వెనుక భాగంలో రెండు బుల్లెట్‌ గాయాలయ్యాయని, ఆ బులెట్లను బయటకు తీసి పరీక్షించగా రివాల్వర్‌ లేదా పిస్టల్‌కు సంబంధించిన బులెట్లు కావచ్చని తేలిందని ఆయన చెప్పారు. మెడ కుడివైపు పైభాగాన ఓ బుల్లెట్‌ గాయముందని, దీంతో వెన్నెముక కేంద్రభాగం పూర్తిగా దెబ్బతిందని చెప్పారు. ఈ గాయానికి 8 సెంటీమీటర్ల దూరంలో మరో బుల్లెట్‌ గాయం ఉందని, దీంతో చిన్నమెదడు పూర్తిగా విచ్ఛిన్నమైందన్నారు.

రెండు నుంచి మూడు అంగుళాల దూరం నుంచే ఈ కాల్పులు జరిగి ఉంటాయని నిపుణులు చెప్పారు. సంఘటన స్థలంలో మృతి చెందినప్పటికీ ఆస్పత్రికి తరలించాక ప్రొటొకాల్‌ ప్రకారం వైద్యులు చికిత్స కోసం ప్రయత్నించారని, అయినా ప్రయోజనం లేకపోయిందన్నారు. ఘటనకు ముందు సూరి భోజనం చేశాడని వెల్లడైంది. కాగా, సూరి మృతదేహాన్ని అతని స్వస్థలం అనంతపురం జిల్లా మద్దెలచెర్వు గ్రామానికి తరలించారు. అతని అంత్యక్రియలు రేపు బుధవారం జరుగుతాయి.