చంద్రబాబు వైఖరీ తట్టుకోలేక పార్టీ వీడుతున్నా: పోచారం

నిజామాబాద్: తెలంగాణపై మాట తప్పిన తమ పార్టీ అధ్యక్షుడు చంద్రబాబునాయుడు వైఖరి తట్టుకోలేకే తాను పార్టీని వీడుతున్నట్లు తెలుగుదేశం పార్టీ సీనియర్ నాయకుడు, బాన్సువాడ శాసనసభ్యుడు పోచారం శ్రీనివాస్‌రెడ్డి మంగళవారం వ్యాఖ్యానించారు. తెలుగు ప్రజల ఆత్మగౌరవం కోసం పోరాడిన దివంగత ముఖ్యమంత్రి నందమూరి తారకరామారావు స్ఫూర్తిగా తెలంగాణ ప్రజల ఆత్మగౌరవం కోసం చిత్తశుద్ధితో పోరాడుతానని చెప్పారు.

తెలంగాణలో ఉన్న చాలామంది తెలుగుదేశం పార్టీ నేతలు నాలాగే ఆలోచిస్తున్నారని ఆయన అన్నారు. తెలంగాణపై తెలుగుదేశం పార్టీ తీరు మారకపోతే ఇక్కడ కష్టమేనని చెప్పారు. తెలంగాణ ప్రజల్లో ప్రత్యేక రాష్ట్రం కావాలనే సెంటిమెంటు బలంగా నాటుకు పోయిందన్నారు. పార్టీ కార్యకర్తలు, ప్రజల మనోభావాల ప్రకారమే నడుచుకోవాల్సిన అవసరం ప్రజాప్రతినిధిగా తనకు ఉందన్నారు. కాగా సోమవారం పోచారం తన కార్యకర్తలతో సమావేశమయ్యారు.