మద్దెలచెర్వు సూరి హత్య వెనక పరిటాల రవి అనుచరులు?

హైదరాబాద్‌: మద్దెలచెర్వు సూరి హత్య వెనక తెలుగుదేశం దివంగత నేత పరిటాల రవి అనుచరులు ఉన్నట్లు అనుమానిస్తున్నారు. ఈ కోణంలో కూడా పోలీసులు దర్యాప్తు చేస్తున్నట్లు తెలుస్తోంది. మద్దెలచెర్వు సూరిని హత్య చేశాడని అనుమానిస్తున్న భాను కిరణ్ కుటుంబ సభ్యులు గత ఆరు నెలలుగా కనిపించడం లేదు. వారు అనంతపురంలోని సాయినగర్‌లో నివాసం ఉంటూ వస్తున్నారు. కానీ గత ఆరు నెలల నుంచి వారు కనిపించడం లేదు. భాను కిరణ్ తల్లి, భార్య, ఇద్దరు పిల్లలను పరిటాల రవి అనుచరులు కిడ్నాప్ చేసి, భయపెట్టి భాను చేత సూరిని హత్య చేయించి ఉంటారని అనుమానాలు వ్యక్తమవుతున్నాయి.

భాను కిరణ్ సోదరి హైదరాబాదులోని కేంద్రీయ విశ్వవిద్యాలయంలో ఉద్యోగం చేస్తోంది. ఆమెను పోలీసులు విచారిస్తున్నారు. భాను కిరణ్ హైదరాబాదులోని కూకట్‌పల్లి పోలీసు స్టేషన్లో లొంగిపోయినట్లు వార్తలు వస్తున్నాయి. అతను పోలీసుల అదుపులోనే ఉన్నట్లు ప్రచారం జరుగుతోంది. అయితే భాను తమ ఆధీనంలో లేడని పోలీసులు చెబుతున్నారు. భాను కోసం గాలిస్తున్నట్లు వారు చెబుతున్నారు. సోదరిని విచారిస్తే భాను ఆచూకీ తెలుస్తుందని అనుకుంటున్నట్లు వారంటున్నారు. సూరి గన్‌మన్ మన్మోహన్ గన్‌తో భాను సూరిని కాల్చి చంపాడు. మన్మోహన్ కోసం పోలీసులు గాలిస్తున్నారు.