చిదంబరం తన రెండో లేఖలో పాత పాటే పాడారు: కెసిఆర్

హైదరాబాద్: అఖిలపక్ష నిర్ణయంపై కేంద్ర హోంమంత్రి చిదంబరం తన రెండో లేఖలో కూడా పాత విషయాన్నే చెప్పారని తెలంగాణ రాష్ట్ర సమితి అధ్యక్షుడు బుధవారం విలేకరులతో అన్నారు. అఖిలపక్షం విషయంలో తమ డిమాండ్లను పట్టించుకోకుండా మొదటి లేఖలో ప్రస్తావించిన విషయాన్నే రెండో లేఖలో చెప్పారని, అందుకే తాము అఖిలపక్షానికి వెళ్లవద్దని నిర్ణయించుకున్నామని అన్నారు. చిదంబరం ఆహ్వానాన్ని తిరస్కరిస్తున్నట్టు చెప్పారు.

ఒక్కో పార్టీనుండి ఇద్దరిని పిలవడం వల్ల లాభం లేదని కెసిఆర్ అన్నారు. ఒక్కో పార్టీ నుండి ఒక్కరిని పిలిస్తేనే లాభం ఉంటుందన్నారు. ఇరు ప్రాంతాల వారు రెండు అభిప్రాయాలు వ్యక్తం చేస్తారని దాంతో ఫలితం ఉండదన్నారు. ఒక్కో పార్టీనుండి ఒక్కరిని పిలవటం వల్ల పార్టీ ఉద్దేశ్యాలు తెలుస్తాయన్నారు. ఈ కారణంగా 6న నిర్వహించే అఖిలపక్షానికి తాము దూరంగా ఉంటామని ఆయన తేల్చి చెప్పారు.