టాలీవుడ్ లింక్స్: తెలుగు సినిమాలకు మద్దెలచెర్వు సూరి పెట్టుబడులు

హైదారబాద్: హత్యకు గురైన మద్దెలచెర్వుకు సూరి టాలీవుడ్ సంబంధాలు పెట్టుకున్నట్లు వార్తలు వస్తున్నాయి. హైదరాబాదులోని మాదాపూర్‌లోని అలేఖ్య ఆపార్టుమెంటులో సూరి ఉన్న ఫ్లాట్ ఓ నిర్మాతదని తెలుస్తోంది. అది శింగనమల రమేష్ అనే నిర్మాతకు చెందిన ఫ్లాట్ అని వార్తలు వెలువడుతున్నాయి. దీన్నిబట్టి సూరి తెలుగు నిర్మాతలతో సంబంధాలు పెట్టుకున్నట్లు అర్థమవుతోందని అంటున్నారు. సూరి ఆస్తుల విలువ దాదాపు 300 కోట్ల రూపాయలు ఉంటుందని అంటున్నారు. దాంతో తెలుగు సినిమాలో భారీగా పెట్టుబడులు పెట్టాలని నిర్ణయించుకున్నట్లు చెబుతున్నారు.

హైదరాబాదులో సూరి పలువురు నిర్మాతలతో చర్చలు జరిపినట్లు కూడా తెలుస్తోంది. ప్రస్తుతం విడుదలైన పలు సినిమాల్లో అతని పెట్టుబడులు కూడా ఉన్నట్లు చెబుతున్నారు. రామ్‌ గోపాల్ వర్మ రక్తచరిత్ర సినిమాకు సూరి పెట్టుబడి పెట్టినట్లు వార్తలు వచ్చాయి. అయితే, దాన్ని సూరి కొట్టిపారేశాడు. తాను పెట్టుబడి పెడితే రక్తచరిత్ర మొదటి భాగంలో పరిటాల రవిని ఎందుకు హీరోగా చూపిస్తారని అతను అడిగాడు. కానీ, అతని మనసు మాత్రం పూర్తిగా సినిమా వైపు మళ్లిందని అంటున్నారు. తెరపై తనను హీరోగా చూసుకోవాలని కూడా అతను కలలు కన్నాడని ప్రచారం జరుగుతోంది.