వైయస్ జగన్ సునామీ కాదు చిచ్చుబుడ్డి: ఎంపీ మధుయాష్కీ

న్యూఢిల్లీ: మాజీ పార్లమెంటు సభ్యుడు, దివంగత ముఖ్యమంత్రి వైయస్ రాజశేఖరరెడ్డి తనయుడు వైయస్ జగన్మోహన్‌రెడ్డి సునామీ కాదని, ఆయనో చిచ్చుబుడ్డి అని నిజామాబాద్ పార్లమెంటు సభ్యుడు మధుయాష్కీ బుధవారం న్యూఢిల్లీలో వ్యాఖ్యానించారు. గతంలో తనకు 156 మంది శాసనసభ్యులు ఉన్నారని చెబుతున్న జగన్‌కు ప్రస్తుతం ఆ సంఖ్య 24కు పడిపోయిందన్నారు. ముందు ముందు అది కూడా ఉండదన్నారు. జగన్ కాంగ్రెసు‌లోనే ఉంటే మంచి భవిష్యత్తు ఉండేదని అభిప్రాయపడ్డారు.

కాంగ్రెసు పార్టీకి అసలైన కార్యకర్తలు తెలంగాణ నేతలేనన్నారు. కాంగ్రెసు ముసాయిదాలోనే తెలంగాణ అంశం ఉన్నదని చెప్పారు. తెలంగాణ రాష్ట్ర సమితి పుట్టక ముందునుండే కాంగ్రెసు పార్టీ తెలంగాణకు కట్టుబడి ఉందని చెప్పారు. తెలంగాణపై కాంగ్రెసు ఎప్పుడూ ఒకే స్టాండ్‌పై ఉందన్నారు. తెలంగాణ ఉద్యమం ఇప్పుడు నాయకుల చేతుల్లో లేదన్నారు. నాయకుల చేతులనుండి ఎప్పుడో ప్రజల చేతుల్లోకి వెళ్లిపోయిందన్నారు. తెలంగాణ ఇచ్చేది, తెచ్చేది కాంగ్రెసు పార్టీయేనన్నారు. ఎవరేం చెప్పినా నేను తెలంగాణవాదిగానే ఉంటానన్నారు.