విభజన సరికాదు, 28 ప్రాంతాల్లో ప్రత్యేకవాదాలు: సీతారాం ఏచూరి

న్యూఢిల్లీ: కేంద్ర ప్రభుత్వం తెలంగాణను ప్రత్యేక రాష్ట్రంగా ఏర్పాటు చేస్తే దేశంలో మరిన్ని ప్రత్యేక వాదనలు పుట్టుకు వచ్చే అవకాశముందని సిపిఎం పార్టీ సీనియర్ నాయకుడు సీతారాం ఏచూరి గురువారం న్యూఢిల్లీలో అన్నారు. జనవరి 6వ తేదిన కేంద్ర హోంమంత్రి చిదంబరం రాష్ట్రంలోని అన్ని పార్టీలతో అఖిలపక్ష భేటీ నిర్వహించునున్న సందర్భంగా ఆయన ఈ వ్యాఖ్యలు చేశారు. కేవలం నివేదిక మాత్రమే ఇస్తామని కేంద్ర ప్రభుత్వం చెప్పిందని, రాష్ట్ర విభజనపై ఎలాంటి వ్యాఖ్యలు ఇంకా చెప్పలేదన్నారు.

కేంద్రం సమైక్యాంధ్రకే కట్టుబడి ఉండాలన్నారు. తెలంగాణను ఇస్తే దేశంలోని వివిధ రాష్ట్రాల్లో 28 ప్రత్యేక డిమాండ్లు వచ్చే అవకాశాలు ఉన్నాయన్నారు. పశ్చిమ బెంగాల్‌లో ఇప్పటికే ప్రత్యేక వాదన బాగా వినిపిస్తుందన్నారు. దేశంలోని అన్ని రాష్ట్రాలను భాషాపయుక్త రాష్ట్రాలుగా ఏర్పరిచినప్పుడు రాష్ట్రాలను మళ్లీ ఇప్పుడు విడగొట్టాలని అనుకోవడం ఏమిటని ఆయన ప్రశ్నించారు. విభజన సరికాదన్నారు.