సెక్స్ స్కామ్ ఆరోపణలపై విజయవాడ సిపి సీతారామాంజనేయులు బదిలీ

విజయవాడ: మహిళలను లైంగికంగా వేధిస్తున్నారంటూ ఆరోపణలు వచ్చిన విజయవాడ నగర పోలీస్‌ కమిషనర్‌ సీతారామాంజనేయులుపై బదిలీ వేటు పడింది. రాష్ట్ర ప్రభుత్వం బుధవారం రాత్రి ఈ నిర్ణయం తీసుకుంది. రామాంజనేయులు స్థానంలో ఏలూరు డీఐజీ సూర్యప్రకాశరావుకు అదనపు బాధ్యతలు అప్పగిస్తూ ఆదేశాలు జారీచేసింది. సీతారామాంజనేయులు డీజీపీ కార్యాలయంలో రిపోర్టు చేయాలని సూచించింది. పోలీస్‌ ఉన్నతాధికారిపై తీవ్రమైన ఆరోపణలు రావడంతో బుధవారం ఉదయం నుంచీ రాజకీయ పార్టీలు, ప్రజాసంఘాలు తీవ్రస్థాయిలో ధ్వజమెత్తాయి. ప్రభుత్వం సీతారామాంజనేయుల్ని బదిలీచేస్తూ రాత్రి పొద్దుపోయాక నిర్ణయం తీసుకుంది.

ఢిల్లీలో ఉన్న ముఖ్యమంత్రి కిరణ్ కుమార్‌ రెడ్డి ఈ విషయంపై స్పందించారు. పోలీస్‌ కమిషనర్‌ పై వచ్చిన ఆరోపణలపై విచారణకు ఆదేశించినట్లు తెలిపారు. విచారణ అనంతరం చర్యలు తీసుకుంటామన్నారు. మరోవైపు డిజీపీ అరవిందరావు ఈ ఘటనపై సీతారామాంజనేయులను వివరణ కోరారు. విచారణ జరపాలని హోంమంత్రి సబితా ఇంద్రారెడ్డి కూడా డీజీపీని ఆదేశించారు.