ప్రత్యామ్నాయాలు కాదు, తెలంగాణ ప్రకటించాలి: ఎమ్మెల్యే కెటిఆర్

హైదరాబాద్: తాము రాష్ట్రం విషయంలో ప్రత్యామ్నాయాలు కోరడం లేదని, ప్రత్యేక తెలంగాణనే కోరుకుంటున్నామని తెలంగాణ రాష్ట్ర సమితి నాయకుడు, సిరిసిల్ల శాసనసభ్యుడు కల్వకుంట్ల రామారావు గురువారం శ్రీకృష్ణ కమిటీ నివేదిక బహిర్గతం అయిన అనంతరం వ్యాఖ్యానించారు. కేంద్ర ప్రభుత్వం ఏర్పాటు చేసిన శ్రీకృష్ణ కమిటీ నివేదికతో మాకు సంబంధం లేదన్నారు. కమిటీతో సంబంధం లేదని గతంలోనే మేం చెప్పామన్నారు.

కమిటీ నివేదికపై చిదంబరం పంపించిన నివేదిక అందిన తర్వాత అధికారికంగా స్పందిస్తానని చెప్పారు. కమిటీలతో తెలంగాణ రాదని ఇదివరకే చెప్పామన్నారు. హైదరాబాదును రాజధానిగా తెలంగాణను మేం కోరుకుంటున్నామన్నారు. హైదరాబాదును ప్రత్యేక రాష్ట్రంగాగానీ, కేంద్రపాలిత ప్రాంతంగా కానీ ఏ తెలంగాణ వ్యక్తులు సమ్మతించరన్నారు. నివేదిక వచ్చింది కాబట్టి ఇప్పుడు నిర్ణయం కేంద్రంపై ఉందన్నారు. కేంద్ర ప్రభుత్వం నిబద్దతో నిర్ణయం తీసుకోవాలని సూచించారు.