రాజీనామాలకు కాంగ్రెసు తెలంగాణ ఎమ్మెల్యేలు, ఎంపీలు రెడీ?

హైదరాబాద్: తెలంగాణ రాష్ట్ర సాధన కోసం రాజీనామాలు చేయడానికి కాంగ్రెసు తెలంగాణ ప్రాంత శాసనసభ్యులు, పార్లమెంటు సభ్యులు సిద్ధపడినట్లు తెలుస్తోంది. శ్రీకృష్ణ కమిటీ నివేదికపై, తమ భవిష్యత్తు కార్యక్రమంపై చర్చించేందుకు కాంగ్రెసు తెలంగాణ ప్రాంత నాయకులు సమావేశమయ్యారు. ఈ సమావేశానికి 23 మంది శాసనసభ్యులు, 7గురు పార్లమెంటు సభ్యులు హాజరయ్యారు. మంత్రులు జానారెడ్డి, బసవరాజు సారయ్య, జూపల్లి కృష్ణారావు కూడా హాజరయ్యారు. బడ్జెట్ సమావేశాల తొలి రోజు తెలంగాణ రాష్ట్ర ఏర్పాటుకు బిల్లు ప్రతిపాదించకపోతే తాను రాజీనామా చేస్తానని జూపల్లి కృష్ణారావు చెప్పినట్లు తెలుస్తోంది. శాసనసభ్యులు, పార్లమెంటు సభ్యులు కూడా రాజీనామాలకు సిద్ధపడినట్లు చెబుతున్నారు.

కాగా, శ్రీకృష్ణ కమిటీ నివేదికతో సంబంధం లేకుండా తెలంగాణ రాష్ట్రాన్ని ఏర్పాటు చేయాలని వారు డిమాండ్ చేస్తున్నారు. అందుకు పార్టీ అధిష్టానంపై ఒత్తిడి తెచ్చేందుకు అవసరమైన మార్గాలను ఎంచుకోవాలని నిర్ణయించినట్లు సమాచారం. సమాచారం ముగిసిన తర్వాత ఉస్మానియా విశ్వవిద్యాలయంలో విద్యార్థులపై జరిగిన కాల్పులను వ్యతిరేకిస్తూ ముఖ్యమంత్రి కిరణ్ కుమార్ రెడ్డిని కలవాలని నిర్ణయించుకున్నట్లు తెలుస్తోంది. సమావేశానికి రాని ఇతర తెలంగాణ ప్రజాప్రతినిధులపై సమావేశంలో ఆగ్రహం వ్యక్తం చేసినట్లు సమాచారం.