కర్ణాటక మంత్రులు గాలి బదర్స్‌కు సుప్రీంకోర్టు సాధికారిక కమిటీ షాక్

న్యూఢిల్లీ: కర్ణాటక మంత్రులు గాలి బ్రదర్స్‌కు షాక్ తగిలింది. గాలి జనార్దన్ రెడ్డి, గాలి కరుణాకర్ రెడ్డిలకు చెందిన అక్రమ మైనింగ్‌పై సాధికారిక కమిటీ కొరడా ఝళిపించింది. ఓబుళాపురం మైనింగ్ కంపెనీ, అనంతపురం మైనింగ్ కార్పోరేషన్ లైసెన్సులు రద్దు చేయాలని సాధికారిక కమిటీ సూచించింది. సాధికారిక కమిటీ శుక్రవారం సుప్రీంకోర్టుకు నివేదిక సమర్పించింది. తాను సమర్పించిన 69 పేజీల నివేదికలో 9 సిఫార్సులు చేసింది.

గాలి జనార్దన్ రెడ్డికి చెందిన సంస్థల మైనింగ్, రవాణాలపై నిషేధం విధించాలని కమిటీ సూచించింది. బళ్లారి, మహబలేశ్వరప్ప కంపెనీలు 2004 నుంచి రిజర్వ్ ఫారెస్టుల్లో అక్రమంగా తవ్వకాలు జరిపాయని ఆరోపిస్తూ అందుకు భారీ జరిమానా విధించాలని కమిటీ సిఫార్సు చేసింది. నాలుగు లీజు లైసెన్సులను రద్దు చేయాలని కమిటీ సూచించింది. ఆ కంపెనీలు రిజర్వ్ ఫారెస్టులను నాశనం చేస్తున్నాయని తెలిపింది.