కాంగ్రెసు ప్రజాప్రతినిధులు రాజీనామాలు చేస్తారు: జీవన్ రెడ్డి

హైదరాబాద్: తెలంగాణ రాష్ట్ర ఏర్పాటు కోసం తమ పార్టీ ప్రజాప్రతినిధులు రాజీనామాలు చేస్తారని ఆశిస్తున్నట్లు కాంగ్రెసు నాయకుడు, మాజీ మంత్రి టి. జీవన్ రెడ్డి తెలిపారు. భవిష్యత్తు కార్యాచరణ కోసం హైదరాబాదులోని నిజాం క్లబ్‌లో శుకవారం సమావేశమయ్యారు. ఈ సందర్భంగా ఆయన మీడియా ప్రతినిధులతో మాట్లాడారు. తెలంగాణ రాష్ట్రం ఇవ్వకపోతే రాజీనామా చేస్తామని డిసెంబర్ 26వ తేదీన తమ పార్టీ మంత్రులు, శాసనసభ్యులు, ఎమ్మెల్సీలు, పార్లమెంటు సభ్యులు ప్రకటించారని, దానికి కట్టుబడి ఉంటారని అనుకుంటున్నానని ఆయన అన్నారు. రాజీనామాలు చేయకపోతే ఎలా అని మీడియా ప్రతినిధులు అడిగితే చేస్తామని అన్నారు, చేయకపోతే ఎలా అనే ప్రశ్న ఎలా వస్తుందని ఆయన అన్నారు.

తెలంగాణ ఇచ్చేది, తెచ్చేది కాంగ్రెసు పార్టీయేనని, ఇప్పటికీ ఆ మాటకు కట్టుబడి ఉన్నామని ఆయన అన్నారు. తెలంగాణ రాష్ట్ర ఏర్పాటే తమ ఏకైక డిమాండ్ అని, పార్లమెంటు బడ్జెట్ సమావేశాల్లో బిల్లు ప్రతిపాదించాల్సిందేనని ఆయన అన్నారు. బిల్లు పెట్టకపోతే కాంగ్రెసు ప్రజాప్రతినిధులు రాజీనామా చేస్తారని ఆయన అన్నారు. శాసనసభ ఆవరణలో మీడియాపై విధించిన ఆంక్షలను ఎత్తేయాలని ఆయన డిప్యూటీ స్పీకర్ నాదెండ్ల మనోహర్‌ను కోరారు. తాము ఏ విధమైన చట్టవ్యతిరేక కార్యకలాపాలకు పాల్పడలేదని, తమపై కూడా ఆంక్షలు విధించడం సరి కాదని, ఆంక్షలు అత్యవసర పరిస్థితిని తలపిస్తోందని ఆయన అన్నారు.