తెలంగాణ ఆందోళనకారులను తాళ్లతో కట్టి లాక్కెళ్లిన పోలీసులు

ఖమ్మం: విద్యాసంస్థలను మూసేయిస్తున్న తెలంగాణ ఆందోళనకారుల పట్ల పోలీసులు వ్యవహరించిన తీరు చర్చనీయాంశంగా మారింది. ఆందోళనకారులను తాళ్లతో కట్టి లాక్కెళ్లి వ్యాన్లలో పడేశారు. శ్రీకృష్ణ కమిటీ నివేదికను వ్యతిరేకిస్తూ పిడిఎస్‌యు కార్యకర్తలు, తెలంగాణ ఆందోళనకారులు గురువారం ఖమ్మంలోని విద్యాసంస్థలను మూసేయించడానికి ప్రయత్నించారు. ఈ సమయంలో ఆందోళనకారులను పోలీసులు అడ్డుకున్నారు.

పోలీసులకు, ఆందోళనకారులకు మధ్య తీవ్ర వాగ్వివాదం చెలరేగింది. చిన్నపాటి తోపులాట కూడా చోటు చేసుకుంది. ఆందోళనకారులను పోలీసులు తాళ్లతో కట్టి లాక్కెళ్లి వ్యాన్లలో పడేశారు. దీనికి సంబంధించిన ఫుటేజ్‌లు తమ వద్ద ఉన్నాయని, అయితే ఎన్‌బిఎ ఆంక్షల వల్ల తాము ప్రసారం చేయడం లేదని ఓ తెలుగు టీవీ చానెల్ ప్రకటించింది. ఆందోళనకారుల్లో మహిళలు కూడా ఉన్నారు.