చిరంజీవికి మెగా షాక్: ఎమ్మెల్యే అనిల్ కుమార్ రాజీనామా?

హైదరాబాద్: ప్రజారాజ్యం పార్టీ అధ్యక్షుడు చిరంజీవికి మరో షాక్ తగిలింది. నిజామాబాద్ జిల్లా బాల్కొండ ప్రజారాజ్యం పార్టీ శాసనసభ్యుడు అనిల్ కుమార్ రాజీనామాకు సిద్ధపడుతున్నారు. ప్రజారాజ్యం పార్టీకి ఆయన రాజీనామా చేసే అవకాశాలున్నాయి. గురువారం హైదరాబాదులోని ఇందిరా పార్కు వద్ద జరిగిన తెలంగాణ జెఎసి ధర్నా కార్యక్రమం వద్ద అనిల్ కుమార్‌కు తీవ్ర పరాభవం జరిగింది. చిరంజీవి సమైక్యాంధ్ర నినాదాన్ని నిరసిస్తూ జెఎసి కార్యకర్తలు అనిల్ ‌ను చెప్పులతో కొట్టారు. ఆయనకు వ్యతిరేకంగా నినాదాలు చేశారు. దీంతో ఆయన వెనుదిరిగి పోవాల్సి వచ్చింది.

కాగా, తెలంగాణ జెఎసి తీరుపై అనిల్ కుమార్ మండిపడుతున్నారు. తనను ధర్నాకు పిలిచి అమానించారని ఆయన మండిపడ్డారు. తమ పార్టీ తెలంగాణకు కట్టుబడి ఉండకపోవచ్చు గానీ తాను తెలంగాణవాదినే అని ఆయన అన్నారు. కాసేపట్లో ఆయన తన రాజీనామా విషయాన్ని ప్రకటిస్తారని వార్తలు వస్తున్నాయి.