రంగారెడ్డి కలెక్టరేట్ వద్ద ధర్నా చేస్తున్న కవిత, విమలక్క అరెస్టు

హైదరాబాద్: పార్లమెంటులో తెలంగాణ బిల్లు ప్రవేశపెట్టాలంటూ డిమాండ్ చేస్తూ సోమవారం తెలంగాణలోని పది జిల్లాల్లో కలెక్టరేట్‌ల వద్ద చేసిన ఆందోళనలో పాల్గొన్న పలువురు నాయకులను, కార్యకర్తలను పోలీసులు అరెస్టు చేశారు. కేంద్రం ఇచ్చిన హామీ మేరకు తెలంగాణను వెంటనే ప్రకటించాలని వారు డిమాండ్ చేశారు. శ్రీకృష్ణ నివేదికతో తమకు సంబంధం లేదన్నారు. రంగారెడ్డి కలెక్టరేట్‌ వద్ద ధర్నాలో పాల్గొన్న భారతీయ జనతా పార్టీ సీనియర్ నాయకులు బండారు దత్తాత్రేయ, బద్దం బాల్‌రెడ్డి, తెలంగాణ జాగృతి అధ్యక్షురాలు కవిత, తెలంగాణ రాష్ట్ర సమితి సీనియర్ నాయకుడు చంద్రశేఖర్, అరుణోదయ విమలక్క, స్వామిగౌడ్, తదితరులను పోలీసులు అరెస్టు చేశారు.

ఈ సందర్భంగా ఒక కార్యకర్త స్పృహ తప్పి పడిపోయారు. అరెస్టు సందర్భంగా అక్కడి పరిస్థితి ఉద్రిక్తంగా మారింది. తమను బలంతంగా అరెస్టు చేస్తున్నారని వారు మండిపడ్డారు. శాంతియుతంగా ధర్నా చేస్తున్న తమపై పోలీసులు దుర్మార్గంగా ప్రవర్తిస్తోందన్నారు. కాగా వరంగల్, కరీంనగర్, ఖమ్మం, నిజామాబాద్, అదిలాబాద్, మెదక్, మహబూబ్‌నగర్ జిల్లాల్లో పాల్గొన్న నాయకుల ధర్నాలకు కూడా పోలీసులు అడ్డుకొని కొందరిని పోలీసులు అరెస్టు చేశారు.