సుమన్ రాథోడ్ ఎస్టీ కాదన్న కేసు: హైకోర్టు తీర్పుపై సుప్రీంకోర్టు స్టే

న్యూఢిల్లీ: ఆదిలాబాద్‌ జిల్లా ఖానాపూర్‌కు చెందిన తెలుగుదేశం శాసనసభ్యురాలు సుమన్‌ రాథోడ్‌ ఎన్నికను రద్దు చేస్తూ హైకోర్టు గతంలో ఇచ్చిన ఉత్తర్వులను సుప్రీంకోర్టు నిలిపివేసింది. ఆమె గిరిజనుల కోటాలో ఎన్నికయ్యారు. ఆ ఎన్నికను సవాలుచేస్తూ కోర్టులో పిటీషన్‌ దాఖలు కావటంతో కోర్టు ప్రభుత్వాన్ని విచారణకు ఆదేశించింది. దీనిపై విచారణ చేసిన ప్రభుత్వం ఆమె మహారాష్ట్ర లంబాడాలకు చెందినవారని అక్కడ ఆ కులం బీసీల కిందకు వస్తుందని తెలిపారు. దీంతో కోర్టు ఆమె ఎన్నికను రద్దు చేసింది. అప్పీలుకు 6 వారాల సమయం ఇచ్చింది. దీంతో ఆమె సుప్రీంకోర్టును ఆశ్రయించారు. మన రాష్ట్రంలో లంబాడాలు ఎస్టీ కనుక తాను చట్టబద్ధంగానే వ్యవహరించానని ఆమె పేర్కొన్నారు. దీంతో కోర్టు హైకోర్టు నిర్ణయంపై స్టే ఇచ్చింది.

కాగా, తన భార్య ఎస్టీ కాదన్న హైకోర్టు తీర్పుపై సుప్రీంకోర్టు స్టే ఇవ్వడంపై తెలుగుదేశం పార్లమెంటు సభ్యుడు రమేష్ రాథోడ్ హర్షం వ్యక్తం చేశారు. ఎవరు అవునన్నా, కాదన్నా ప్రజల మద్దతు ఉన్నంత వరకు సుమన్ రాథోడ్ శాసనసభ్యురాలిగా కొనసాగుతారని ఆయన అన్నారు. సుమన్ ఎస్టీయేనని ఆయన అన్నారు. సుప్రీంకోర్టు తీర్పు తమకు అనుకూలంగా వస్తుందనే నమ్మకం ఉందని ఆయన ఆశాభావం వ్యక్తం చేశారు.