వైయస్ జగన్ క్యాంప్ ఎమ్మెల్యేల సవాల్‌కు డిఎల్ రవీంద్రారెడ్డి రెడీ

హైదరాబాద్: మాజీ పార్లమెంటు సభ్యుడు వైయస్ జగన్ వర్గానికి చెందిన కడప జిల్లా కాంగ్రెసు శాసనసభ్యుల సవాల్‌ను స్వీకరించడానికి రాష్ట్ర వైద్య మంత్రి డిఎల్ రవీంద్రా రెడ్డి సిద్ధపడ్డారు. కడప జిల్లాకు చెందిన ఐదుగురు జగన్ వర్గానికి చెందిన కాంగ్రెసు శాసనసభ్యులకు ఆయన మంగళవారం మీడియా ప్రతినిధుల సమావేశంలో ప్రతి సవాల్ విసిరారు. జగన్ వర్గానికి చెందిన ఐదుగురు శాసనసభ్యులు రాజీనామా చేస్తే తాను రాజీనామా చేయడానికి తాను సిద్ధమని ఆయన చెప్పారు.

నేనో, మీరో తేల్చుకుందామని ఆయన జగన్ వర్గానికి చెందిన శాసనసభ్యులకు సవాల్ విసిరారు. జగన్ వర్గానికి చెందిన ఐదుగురు శాసనసభ్యులు శాసనసభకు రావాలని, వారితో పాటు తాను రాజీనామా చేసి తిరిగి ఎన్నికలకు సిద్ధపడతానని ఆయన అన్నారు. అర్ధరాత్రి వచ్చినా తాను సిద్ధమేనని, ఆరుగురుం రాజీనామా చేద్దామని ఆయన అన్నారు. ఎవరి భవిష్యత్తు ఏమిటో అప్పుడు తేలిపోతుందని ఆయన అన్నారు.