రాజీనామా చేసి ఉద్యమంలోకి రండి: టిడిపి, కాంగ్రెసు నేతలతో కోదండరామ్

కరీంనగర్: రానున్న పార్లమెంటు బడ్జెట్ సమావేశాల్లో తెలంగాణ బిల్లును ప్రవేశ పెట్టే విధంగా కాంగ్రెసు పార్టీ తెలంగాణ నేతలు తమ పార్టీ అధిష్టానంపై ఒత్తిడి తీసుకు రావాలని తెలంగాణ ఐక్య కార్యాచరణ సమితి చైర్మన్ ప్రొఫెసర్ కోదండరామ్ బుధవారం డిమాండ్ చేశారు. తెలుగుదేశం పార్టీ ఎమ్మెల్యేలు కూడా పార్టీ అధ్యక్షుడు చంద్రబాబుపై ఒత్తిడి తీసుకు రావాలని డిమాండ్ చేశారు. లేదంటే వారు వెంటనే రాజీనామాలు చేసి తెలంగాణ ఉద్యమంలో పాల్గొనాలని ఆయన అన్నారు.

కాగా తెలంగాణ రాష్ట్ర సమితి కార్యకర్తలు మహబూబ్‌నగర్‌లో మంత్రి డికె అరుణ ఇంటిముందు ధర్నాకు దిగారు. మంత్రి పదవికి వెంటనే రాజీనామా చేయాలని డిమాండ్ చేశారు. తెలంగాణ ఉద్యమంలో పాల్గొనాలన్నారు. రానున్న పార్లమెంటు బడ్జెట్ సమావేశాల్లో తెలంగాణ బిల్లు పెట్టేందుకు పార్టీ అధిష్టానంపై ఒత్తిడి తేవాలని, ఉస్మానియా యూనివర్శిటీలో ఉన్న బలగాలను తొలగించేందుకు ప్రభుత్వంపై ఒత్తిడి తీసుకు రావాలని ఆమెను కోరారు.