తెలంగాణ ఆసరాతో కిరణ్ కుమార్ ప్రభుత్వంపై వైయస్ జగన్ ప్లాన్

హైదరాబాద్: మాజీ పార్లమెంటు సభ్యుడు వైయస్ జగన్ తెలంగాణ పరిణామాలపైనే ఆధారపడినట్లు తెలుస్తోంది. తెలంగాణ అంశంపైన ఆధారపడి తన భవిష్యత్తు వ్యూహాన్ని రూపొందించుకునే ఆలోచనలో ఉన్నట్లు తెలుస్తోంది. తాను తలుచుకుంటే ముఖ్యమంత్రి కిరణ్ కుమార్ రెడ్డి ప్రభుత్వాన్ని కూల్చగలనని, తనకు ఆ ఉద్దేశం లేదని, తాను మంచివాడిని కాబట్టే ప్రభుత్వాన్ని కూల్చలడం లేదని వైయస్ జగన్ చెప్పుకున్నారు. ప్రభుత్వాన్ని కూల్చే ప్రయత్నాలు తాను చేసినట్లు కనిపించకూడదనేది జగన్ వ్యూహంగా కనిపిస్తోంది. అయితే, ఎప్పటికప్పుడు అస్థిరపరిచే ప్రయత్నాలు సాగిస్తూ ముందుకు సాగాలని ఆయన అనుకుంటున్నట్లు భావించవచ్చు. అయితే, తెలంగాణ అంశం కిరణ్ కుమార్ రెడ్డి ప్రభుత్వాన్ని పడగొట్టే దిశగా సాగుతుందని ఆయన అనుకుంటున్నట్లు చెప్పవచ్చు.

తాము ప్రభుత్వాన్ని కూలగొట్టబోమని, అయితే తెలంగాణ అంశం వల్ల ప్రభుత్వం పడిపోవచ్చునని వైయస్ జగన్ వర్గానికి చెందిన ఓ నాయకుడు మంగళవారం ఢిల్లీలో అన్నారు. దీన్నిబట్టి తెలంగాణ వివాదం ముదిరి కాంగ్రెసు తెలంగాణ ప్రాంత శాసనసభ్యులు రాజీనామాలకు దిగుతారని, దానివల్ల ప్రభుత్వం పడిపోయే స్థితి వస్తుందని, ఆ సమయంలో దాన్ని తమకు అనుకూలంగా మలుచుకోవాలని వైయస్ జగన్ భావిస్తున్నట్లు చెప్పవచ్చు.