వైయస్ జగన్‌ పై కాంగ్రెసు ఎమ్మెల్యే ఆనం వివేకానంద రెడ్డి ఫైర్

నెల్లూరు: మాజీ పార్లమెంటు సభ్యుడు వైయస్ జగన్మోహన్ రెడ్డిపై నెల్లూరు జిల్లాకు చెందిన కాంగ్రెసు శానసనసభ్యుడు ఆనం వివేకానంద రెడ్డి తీవ్రంగా మండిపడ్డారు. తాను తలుచుకుంటే ప్రభుత్వం కూలిపోతుందని, తన దయాదాక్షిణ్యాల మీదనే ప్రభుత్వం మనుగడ సాగిస్తోందని వైయస్ జగన్ అనడాన్ని ఆయన తప్పు పట్టారు. అలాంటి మాటలు అనడం వైయస్ జగన్‌కు తగదని ఆయన అన్నారు. దమ్ము, ధైర్యం ఉంటే వైయస్ జగన్ ప్రభుత్వాన్ని పడగొట్టాలని ఆయన సవాల్ చేశారు.

తన వెంట వస్తున్న శాసనసభ్యుల చేత వైయస్ జగన్ రాజీనామా చేయించాల్సిన అవసరం ఉంటుందని, కాంగ్రెసు తరఫున గెలిచిన శాసనసభ్యులను తన వెంట తీసుకుని వెళ్లడం సరి కాదని ఆయన అన్నారు. వైయస్ జగన్ వెంట వెళ్తున్న శానససభ్యులపై కూడా ఆయన విమర్శలు చేశారు. వైయస్ జగన్ వెంట వెళ్లానుకుంటే, కాంగ్రెసు నుంచి వెళ్లిపోవాలనుకుంటే శాసనసభ్యులు రాజీనామా చేయాలని ఆయన అన్నారు.