అధిష్టానంతోనే సిఎంకు చిక్కులు, కిరణ్‌ మార్పుతో తేలదు: నారాయణ

హైదరాబాద్: కాంగ్రెసు పార్టీ అధిష్టానం తీసుకుంటున్న తప్పుడు నిర్ణయాల వల్ల సమర్థుడైన ముఖ్యమంత్రి కిరణ్‌కుమార్‌రెడ్డి కూడా ఏం చేయలేక పోతున్నారని సిపిఐ రాష్ట్ర కార్యదర్శి గురువారం వ్యాఖ్యానించారు. కిరణ్‌కుమార్‌రెడ్డి మంచి నాయకుడని అయితే అధిష్టానం చర్యల వల్ల ఆయనకు ఏం చేయని పరిస్థితి ఉందన్నారు. ప్రస్తుత పరిస్థితుల్లో ఉక్కు మనిషి వచ్చినా కూడా రాష్ట్రంలోని పరిస్థితిని మార్చలేరని ఆయన అభిప్రాయపడ్డారు. రాష్ట్రంలోని పరిస్థితి అంతా గందరగోళంగా ఉందన్నారు.

పార్టీ అధిష్టానం శ్రీకృష్ణ కమిటీ నివేదిక అనంతరమైనా స్పష్టమైన నిర్ణయం తీసుకోవాల్సి ఉండాల్సింది అని అన్నారు. పార్టీ స్పష్టమైన నిర్ణయాలు తీసుకోకుండా రాష్ట్రంలో ముఖ్యమంత్రులను మారిస్తే లాభమేమిటని ప్రశ్నించారు. రోశయ్యను, కిరణ్‌కుమార్‌రెడ్డిని ఇలా మార్చుకుంటూ పోతే రాష్ట్ర పరిస్థితి మారదన్నారు. మొదట అధిష్టానం స్పష్టమైన నిర్ణయం తీసుకోవాలన్నారు.