జనవరి 20వ తేదీ తర్వాత తెలంగాణపై సోనియా గాంధీ దృష్టి

న్యూఢిల్లీ: ఈ నెల 20వ తేదీ తర్వాతనే కాంగ్రెసు అధ్యక్షురాలు సోనియా గాంధీ తెలంగాణ అంశంపై దృష్టి పెట్టే అవకాశాలున్నట్లు తెలుస్తోంది. ఆ తర్వాతనే ఆంధ్రప్రదేశ్ వ్యవహారాలను ఓ కొలిక్కి తెచ్చే అంశాలపై చర్చలు జరిపి నిర్ణయాలు తీసుకుంటారని అంటున్నారు. గురువారం ఆమె ఎఐసిసి ముఖ్యనేతలతో సమావేశమయ్యారు. ఈ నెల 17వ తేదీన ఆమె పార్టీ అత్యున్నత నిర్ణాయక సంస్థ కాంగ్రెసు వర్కింగ్ కమిటీ (సిడబ్ల్యుసి)ని పునర్వ్యస్థీకరిస్తారని అంటున్నారు.

ఆ తర్వాత 18 - 20 తేదీల మధ్య కేంద్ర మంత్రివర్గాన్ని పునర్వ్యస్థీకరించే అవకాశాలున్నాయి. మంత్రివర్గ పునర్వ్యస్థీకరణలో తెలంగాణకు చెందిన ఒకరిద్దరికి మంత్రి పదవులు ఇచ్చే సూచనలున్నట్లు చెబుతున్నారు. ఆ తర్వాతనే ఆంధ్రప్రదేశ్ వ్యవహారాలను చక్కదిద్దే పనిలో నిమగ్నమవుతారని అంటున్నారు. డిప్యూటీ ముఖ్యమంత్రి, శాసనసభ స్పీకర్ ఎంపిక అంశాలతో పాటు తెలంగాణ అంశం కూడా ఆమె ప్రాధాన్యతల్లో చేరుతాయని అంటున్నారు.