చంద్రబాబు పావులు దేవేందర్, రేవంత్ రెడ్డి: నాగం జనార్దన్ రెడ్డికి చెక్

హైదరాబాద్: తెలంగాణ పోరాటాన్ని ముందుకు తీసుకుపోవాలని ప్రయత్నిస్తున్న తెలుగుదేశం తెలంగాణ ఫోరం అధ్యక్షుడు నాగం జనార్దన్ రెడ్డికి చెక్ పెట్టేందుకు ఆ పార్టీ అధ్యక్షుడు నారా చంద్రబాబు నాయుడు ఇద్దరు తెలంగాణ నాయకులను పావులుగా వాడుకుంటున్నారనే వ్యాఖ్యలు వినిపిస్తున్నాయి. తెలంగాణ గుండె చప్పుడు రాజ్ న్యూస్ ఆ వ్యాఖ్యలు చేస్తోంది. నాగం జనార్దన్ రెడ్డికి చెక్ పెట్టేందుకు దేవేందర్ గౌడ్, రేవంత్ రెడ్డిలను చంద్రబాబు వాడుకుంటున్నారని ఆరోపిస్తోంది. తెలంగాణ గురించి నాగం జనార్దన్ రెడ్డి మాట్లాడితే చాలు, వారిద్దరు రంగంలోకి దిగుతారని అంటోంది. ఒకప్పుడు నాగం జనార్దన్ రెడ్డికి వ్యతిరేకంగా మాట్లాడుతూ వచ్చిన తెలంగాణ రాష్ట్ర సమితి (తెరాస) వర్గాలు ఇప్పుడు తమ వైఖరిని మార్చుకున్నట్లు కనిపిస్తోంది. నాగం జనార్దన్ రెడ్డిని తమ వైపు లాక్కోవడానికి ప్రయత్నిస్తున్నారు.

దేవేందర్ గౌడ్, రేవంత్ రెడ్డిలపై రాజ్ న్యూస్ తీవ్ర వ్యాఖ్యలు చేసింది. తెలుగుదేశం పార్టీకి రాజీనామా చేసి, నవ తెలంగాణ పార్టీని పెట్టడానికి ముందు దేవేందర్ గౌడ్ చంద్రబాబుపై చేసిన తీవ్ర వ్యాఖ్యలను గుర్తు చేస్తోంది. తెలుగుదేశం ఏకవ్యక్తి పార్టీ అంటూ చంద్రబాబు తీరును అప్పట్లో దేవేందర్ గౌడ్ తీవ్రంగా వ్యతిరేకించారు. చంద్రబాబుపై ఆయన చేసిన వ్యాఖ్యలను రాజ్ న్యూస్ పూర్తిగా ప్రసారం చేసింది. రేవంత్ రెడ్డిని తాచుపాములా అభివర్ణించింది. మాటలకు బురద పాము అని వ్యాఖ్యానించింది. ప్రజల్లోకి వెళ్తే బండబూతులు తిడతారని రేవంత్ రెడ్డికి తెలుసునని వ్యాఖ్యానించింది.