సూరి హత్యలో వైయస్ జగన్ కాదు, చంద్రబాబు హస్తం: భానుమతి

అనంతపురం‌: తన భర్త హత్యపై మద్దెలచెర్వు భార్య గంగుల భానుమతి సంచలన వ్యాఖ్యలు చేశారు. తన భర్త హత్యకు తెలుగుదేశం పార్టీ అధ్యక్షుడు నారా చంద్రబాబునాయుడు మద్దతు ఉందని ఆమె శుక్రవారం మీడియా ప్రతినిధుల వద్ద ఆరోపించారు. తన భర్త సూరిని హత్య చేసిన భాను కిరణ్‌తో తెలుగుదేశం పార్టీ నాయకుడు వల్లభనేని వంశీ, పరిటాల రవి పెద్ద కుమారుడు శ్రీరాములు కుమ్మక్కయ్యారని ఆమె ఆరోపించారు. తెలుగుదేశం పార్టీ నాయకుల మద్దతు ద్వారానే సూరి హత్య జరిగిందని, మేమున్నామని సూరి హంతకులకు తెలుగుదేశం నాయకులు ధైర్యం చెప్పారని ఆమె అన్నారు.

తన భర్త సూరి హత్యతో మాజీ పార్లమెంటు సభ్యుడు వైయస్ జగన్ బంధువులకు, కాంగ్రెసుకు, మంగలి కృష్ణ లేరని ఆమె స్పష్టం చేశారు. సూరి హత్య కేసును సిబిఐకి అప్పగించాలని ఆమె ప్రభుత్వాన్ని డిమాండ్ చేశారు. భాను కిరణ్ వెలుగులోకి వస్తే అసలు వాస్తవాలు బయటపడుతాయని ఆమె అన్నారు. భాను కిరణ్ ఆస్తులను కనుగొనడంపై ఉన్న శ్రద్ధ పోలీసులకు భానును పట్టుకోవడంలో లేదని ఆమె వ్యాఖ్యానించారు. భాను కిరణ్ నమ్మకద్రోహానికి పాల్పడ్డాడని ఆమె అన్నారు.